Homonimia: prodúcese cando dúas palabras con significados diferentes coinciden na forma (debido á evolución fonética da lingua ou á coincidencia dun préstamo cunha palabra xa existente).
- Exemplo de coincidencia por evolución fonética:
Lazo: (de laqueu): nó, lazada.
Lazo: (de glatiu): tona de xeo sobre un líquido.
- Exemplo de coincidencia dun préstamo cunha palabra xa existente:
Carpa: peixe.
Carpa (do quechua): circo.
Se temos unha soa forma para varios significados, a única maneira de sabermos se estamos ante un caso de polisemia ou homonimia é recorrendo á etimoloxía. Habitualmente, nos dicionarios os homónimos teñen entradas diferentes, normalmente numeradas, ex:
Lía 1 ( de liar) Corda trenzada de esparto.
Lía 2 (célt, lega) 1. Pouso, feces 2. Bullo, depósitos que se forman nos líquidos fermentados.