Actividade de lectura
O astrolabio
O astrolabio é un antigo instrumento que permite determinar a posición e altura das estrelas sobre a bóveda celeste. A palabra astrolabio procede etimoloxicamente do grego ἀστρολάβιον, que pode traducirse como «buscador de estrelas». O astrolabio era usado polos navegantes, astrónomos e científicos en xeral para localizar os astros e observar o seu movemento, para determinar a hora a partir da latitude ou, viceversa, para pescudar a latitude coñecendo a hora. Tamén serve para medir distancias por triangulación.
En realidade, non se sabe ben quen foi o inventor orixinal. Algunhas obras do astrónomo e matemático grego Claudio Ptolomeo, como o Almaxesto, xa describen no século II a súa construción e foron utilizadas por outros matemáticos posteriores como Hipatia de Alexandría para mellorar os seus cálculos. Sábese que Hipatia traballou co seu pai, o astrónomo Teón, para facer correccións no Almaxesto de Ptolomeo e construír un astrolabio. Tamén sabemos que Hiparco de Nicea xa construía astrolabios antes que Ptolomeo e Hipatia. O astrolabio máis antigo que se conserva na actualidade foi construído polo astrónomo persa Nastulus cara ao ano 927 d.C. e encóntrase no Museo Nacional de Kuwait. No século VIII d.C. xa era amplamente coñecido no mundo islámico. A Europa chega no século XII a través da España musulmá.
Os mariñeiros musulmáns a miúdo usábano tamén para calcular o horario de oración e localizar a dirección da Meca. Durante os séculos XVI a XVIII, foi utilizado como o principal instrumento de navegación, até a invención do sextante, en 1750.
Actividade. Hoxe en día o astrolabio foi substituído por programas de ordenador. Un dos máis importante é o programa libre chamado Stellarium.
Entra na páxina de Stellarium e manexa un pouco o programa, o podes encontrar online en:
https://www.rollapp.com/app/stellarium
Ou, se o prefires, podes instalar o programa no teu ordenador desde:
Entra en Stellarium e configuralo para poder ver o ceo desde o teu lugar de residencia.
Que constelacións podes ver?
Hai planetas hoxe que se poidan ver desde o teu lugar de residencia?