Se revisas o teu horario, verás o nome de varias ciencias. Imos ver as ciencias da natureza como exemplo delas.

BIOLOXÍA: é a ciencia que estuda a vida: a composición dos seres vivos, a célula, os distintos organismos e a súa interacción, entre outros aspectos.

XEOLOXÍA: é a ciencia que estuda a estrutura, a dinámica e a composición do planeta Terra, entre outros aspectos.

FÍSICA: estuda as leis que explican fenómenos do universo, como o movemento ou a enerxía, e a súa interacción.

QUÍMICA: estuda a composición da materia e as transformacións da natureza das mesmas.

• Un mesmo método de traballo

Todas as ciencias experimentais, como as catro que vimos, seguen un mesmo método de traballo:

1. OBSERVACIÓN dalgún aspecto da realidade.
2. FORMULACIÓN DUNHA PREGUNTA, a partir do observado.
3. HIPÓTESE, unha explicación posible sen probar. 
4. DESEÑO DUN PROXECTO, que indique que imos facer e como imos investigar.
5. EXPERIMENTACIÓN, cando desenvolvemos o proxecto e imos recollendo datos. 
6. CONCLUSIÓNS, cando en función dos resultados (PROBAS ou EVIDENCIAS), chegamos ás conclusións.

Con un exemplo pode quedar máis claro:

OBSERVACIÓN: cando tomamos unha determinada bebida X non nos concentramos nos estudos.

PREGUNTA: inflúe a bebida X no rendemento cando estudamos?

HIPÓTESE: pode ser porque ten cafeína e pónnos nerviosos.

PROXECTO: deseño un experimento onde, por exemplo, escollo 5 persoas que toman X e outras 5 que non toman X. Rexistro os datos dunha proba de estudo cun exame ao final do tempo.

EXPERIMENTACIÓN: realizo os experimentos do proxecto e tomo datos.

CONCLUSIÓNS: cos resultados podo dicir se no grupo que estudei o seu rendemento estivo ou non afectado por beber X. Os datos que presento son as PROBAS ou EVIDENCIAS.

Non foi tan complicado.