Redactar un bo proxecto antes de iniciar unha investigación en ciencias é fundamental para garantir o éxito do traballo. O proxecto serve como guía para organizar as ideas, definir obxectivos claros e establecer os pasos a seguir. Ademais, axuda a prever posibles problemas e buscar solucións antes de comezar, aforrando tempo e recursos. No proxecto, tamén se identifican as ferramentas e materiais necesarios, o que facilita a planificación. Finalmente, un proxecto ben redactado permite comunicar mellor o propósito e a relevancia da investigación, tanto ao profesorado como a posibles colaboradores. É o primeiro paso cara a unha ciencia ben feita!

Onde o redactaremos?

Para redactar o proxecto de investigación tedes un formulario dispoñible nas actividades desta unidade.  

Quen o redacta?

O grupo de investigación ao completo. NON serve dividir o traballo entre as persoas integrantes do grupo. O conxunto do proxecto debe ser elaborado polo grupo en conxunto. 

Como se corrixe e mellora o proxecto?

O profesor ou profesora indicará como enviar os distintos borradores do proxecto (aula virtual, correo electrónico, etc. ). 

Quen o aproba para iniciar a investigación?

O teu profespr ou a túa profesora. Irá mellorando o voso proxecto, até validar unha versión final. 

Agora, con moita calma, imo ver cada apartado por separado. 

Tedes o recadro para encher con todos os datos solicitados.

Usade os nomes e apelidos completos, tal e como aparecen no voso documento de identidade. A forma correcta de ordenalos é por orde alfabética do primeiro apelido, indicando primeiro os apelidos e despois o nome.

Un exemplo

Bello Pérez, Alfonso; Núñez Marcos, Paula; Rodríguez Fernández, Marcos.

A data é a do primeiro envío ao/á docente.  
 

No resumo do proxecto debe figurar, en primeiro lugar, a pregunta de investigación e unha breve explicación do tema do traballo, que reflicta claramente o seu propósito. Tamén é importante incluír unha breve descrición dos obxectivos principais, explicando que se quere investigar ou resolver. Debe indicarse a metodoloxía prevista, resumindo como se levará a cabo o traballo. Ademais, é útil mencionar os recursos necesarios e a relevancia do proxecto, destacando a súa importancia ou aplicación. Por último, o resumo debe ser claro, conciso e comprensible.

A idea é que a persoa que lea o resumo teña unha idea xeral do que pretendedes. 

Extensión aproximada: entre 700 e 1000 caracteres, contando os espazos.  

Lembrade escribir no cadro azul. O verde é para que o profesor ou a profesora faga os comentarios de avaliación e mellora das versións, ate chegar a versión final. 

Un exemplo:

Este proxecto ten como obxectivo investigar os factores que afectan o comportamento e os hábitos alimenticios dos caracois comúns (Helix aspersa). Analizaremos como varían as súas preferencias alimenticias en función de diferentes condicións ambientais, como a humidade, a temperatura e a luz. A metodoloxía inclúe a creación de hábitats controlados onde se observarán os caracois durante dúas semanas, rexistrando datos sobre a súa actividade e consumo de distintos alimentos. O estudo busca comprender mellor o papel dos caracois nos ecosistemas e promover boas prácticas para o seu coidado en contornas naturais ou controladas.