Sensibiliza
Nas sociedades humanas temos un xeito de intervir para mudar as cousas que é sensibilizar. Isto imos facer no momento da reflexión desta parte do camiño que nos achega á investigación.
Tarefas:
- En parellas ou individualmente definide unha idea que sirva para sensibilizar á sociedade de que resulta preciso mellorar a presenza das mulleres na investigación científica e na tecnoloxía. Non vos poñades directamente a traballar, primeiro toca idear.
- Levade esa idea a un cartel publicitario que conteña unha imaxe e unha mensaxe escrita. Neste caso non usedes IA (intelixencia artificial), xa que interesan as decisións da vosa mente e as vosas ideas.
- Colgade os carteis na aula de clase ou nos corredores.
- En grupos, facede unha lista de características que creades vos permitan seleccionar o mellor cartel, por exemplo, que teña unha mensaxe clara, que use unhas cores determinadas, etc. O importante é que decidades vos eses criterios de calidade.
- Aplicando eses criterios seleccionade un cartel que represente á aula de clase.
- Cos cartéls seleccionados iniciade unha campaña publicitaria no centro educativo ou fóra del. Pode ser con carteis impresos ou a través das redes.
Deste xeito, ata divertido, estades contribuíndo á transformación social.
Recomendacións para un bo cartel publicitario
1. Define o obxectivo do cartel
- Antes de comezar, pensa que queres transmitir. O cartel debe ter unha mensaxe clara, como sensibilizar sobre un tema, informar ou animar a tomar unha acción. Neste caso, fomentar a igualdade na ciencia.
2. Usa un título curto e impactante
- O título ou lema debe chamar a atención de inmediato.
- Pensa nunha frase breve, directa e memorable. Exemplo: “Máis mulleres na ciencia, máis futuro para todose todas!”
3. Combina imaxes e texto de forma equilibrada
- A imaxe debe estar relacionada coa mensaxe e captar a atención ao instante.
- Usa texto breve e léxico sinxelo, para que calquera persoa poida entendelo á primeira vista.
4. Escolle cores adecuadas
- As cores deben destacar o cartel e ser agradables á vista. Evita cores que non combinen ou saturen demasiado.
- Usa contrastes para que o texto sexa fácil de ler (exemplo: letras escuras sobre fondos claros).
5. Organiza a información de forma clara
- Divide o cartel en partes: título, corpo (a mensaxe principal) e contacto ou chamada á acción, se é necesario.
- Evita sobrecargar o cartel con demasiados elementos.
6. Usa fontes lexibles
- Elixe tipografías claras e doadas de ler. Evita letras demasiado decorativas ou pequenas.
- Limita o uso de diferentes tipos de letra a 2 ou 3.
7. Inclúe unha chamada á acción
- Indica que queres que faga o público despois de ver o cartel. Exemplo: “Participa na nosa campaña!”
8. Revisa o deseño final
- Asegúrate de que non haxa erros ortográficos nin gramaticais.
- Comproba que a mensaxe é clara e que os elementos visuais non distraen do propósito principal.
9. Inspírate en exemplos reais
- Busca ideas en carteis publicitarios de campañas sociais, culturais ou educativas para ver como organizan a información e os elementos visuais.
10. Sé creativo e orixinal
- Introduce ideas propias ou elementos únicos que fagan destacar o teu cartel. Usa metáforas visuais ou imaxes que impacten e conecten coa audiencia.