A literatura polo camiño dos cantares
3.3.1- Propostas para crear o teu conto
Proposta de actividade 1
Inventa un conto seguindo cada unha das etapas deste esquema de Vladimir Propp:
- Describe o heroe ou heroína (pode ser unha persoa, mais tamén un animal ou ser imaxinario).
- O personaxe desexa acadar algunha cousa: un obxecto máxico, algo que lle roubaron ou perdeu, un poder…
- Sae da súa casa ou país. Describe a marcha: vai só, acompáñao alguén…
- Prodúcese un encontro cun amigo. Quen?, animal, fada, mago…
- Chega ao lugar desexado. Pero antes, debe superar unha ou máis probas: adiviña, dragón, monte enfeitizado…
- Cómo é o sitio do destino? Castelo, cova…
- Encontro co inimigo. Descríbeo.
- Loita co inimigo (a loita tamén pode ser dialéctica). Descríbeo.
- Consegue o obxectivo.
- Volve ao fogar. Á volta, novos obstáculos.
- Final da historia.
- Nalgún momento da historia debes incluír, polo menos, un cantar popular (creado por tí ou selecconado entre os moitos que existen).
Proposta de actividade 2
Se o prefires, podes escribir a historia que puido dar lugar a este cantar que, coma nas Cantigas de amigo medievais, fai da fonte o lugar de encontro dos namorados.
Miña mai mandoume á fonte á punta da Salgueiriña.
Mandoume fregar a xarra e coa flor do romeiriño.
E eu fregueilla cunha area e rompínlle un boqueliño.
Dime tu perra traidora onde tíñalo sentido.
Nin o tiña na roca nin tampouco no sarillo.
Tíñacho naquel galán que anda de amores comigo.
Proposta de actividade 3
Podes escoller un dos seguintes cantares que sexa do teu gusto e compór con el unha pequena historia na que teña sentido o cantar.
A túa color se volva da cinta do meu sombreiro, que tan pronto me esqueciche por ser teu amor primeiro. |
Xa non teño pai nin nai nin nesta terra parentes, son filla das herbas tristes, neta das augas correntes. |
Máis quero ter sete febres e ser picada da cobra que ter a mala veciña axexando á miña porta. |
Os ollos con que me miras non son os acostumados; na túa cara coñezo que andan os tempos mudados. |
Teño de ir a Vendilló por un ramiño de toxo, para llo dar aos enoxados que se lles pase o enoxo. |
Voume indo, voume indo, voume indo pouco a pouco. Anda o trasno no quinteiro, Teño de ir un pé tras outro. |
Non poñas a vista torta, mira para min dereito, que che quero perguntar o mal que che teño feito. |
Canta, rula, canta, rula, canta, rula, naquel souto; coitadiño do que espera polo que está na man doutro. |
A un tempo non pode ser o ter e mais o gastar, nin que luza o sol na eira e que chova no nabal. |
Mociño tan fachendeiro que me chamache delgada, has de saber que non teño falta de ti para nada. |
Unha vella revisvella, vella como o meu chapeu, tratáronlle o casamento levantou as mans ao ceu. |
Miña sogra ao me casar prometeume bois e vacas, cando me foi dálo dote doume unha cunca de papas. |
Chamácheme pito cairo porque nacín no xaneiro, si me non come o raposo hei cantar no teu poleiro. |
Non me casés miña nai con home que viudou, non quero criar os pitos que outra galiña deitou. |
Dios che me deia pacencia con esta miña muller; nin ela fai o que eu digo, nin eu fago o que ela quer. |
Ser solteiro é boa cousa e ser casado tamén, deixarei para cando morra pensar o que me convén. |
Fun ó muiño do meu compadre,
fun polo vento e vin polo aire.
Estas son cousas de encantamento
ir polo vento e vir polo aire.
Véndeme os bois e véndeme as vacas
e non me vendas a cunca das papas
véndeme a cunca e o cunqueiro
non me vénda-la paz do gaiteiro
Ademais...
Xa que a actividade proposta é a creación dun conto, será bo que repases na páxina seguinte os elementos que conforman unha narración literaria.