2.1. Como nos informamos?

Glosario

Audiovisual

Definición:: Formato de comunicación que mestura son e imaxe.
Exemplo:: A mestra dixo que ía facer unha presentación audiovisual, con imaxes e son.

Correo electrónico

Definición:: Sistema de mensaxería a través de Internet.
Exemplo:: O meu enderezo de correo electrónico é xiana@pontevella.gal

Imprenta

Definición:: Establecemento onde se imprimen diferentes tipos de documentos en papel, tea ou outros soportes.
Exemplo:: Levamos á imprenta os carteis do noso festival de música.

Mapa mental

Definición:: Esquema para organizar os contidos de maneira gráfica.
Exemplo:: A mestra fixo un mapa mental para organizar a clasificación dos invertebrados.

Multimedia

Definición:: Utilización conxunta de sons, imaxes, texto ou vídeo e incluso interactividade nun só arquivo.
Exemplo:: Os libros dixitais son sistemas de comunicación multimedia xa que integran todo tipo de ficheiros e interactividade.

Nube de palabras

Definición:: Composición de palabras que pode ter diferentes formas.
Exemplo:: Na clase fixemos unha nube de palabras sobre o fondo dunha radio. Incluímos dez palabras.

Retroalimentación

Definición:: A retroalimentación é coma un "consello" ou "axuda" que recibes despois de dicir, publicar ou facer algo. A persoa que o recibe faiche saber que podes modificar e que podes cambiar para obter un resultado mellor a próxima vez.
Exemplo:: Na miña exposición oral na aula, os meus amigos dixéronme que podía falar máis alto e de forma máis pausada, así evitaría atrapallarme. (A retroalimentación é a palabra para explicar as correccións feitas polos amigos e polas amigas).

A evolución dos medios de comunicación

Poñamos en orde os nosos coñecementos previos

Ordena os medios de comunicación tendo en conta a liña temporal que acabas de ver.

Papel
Imprenta
Xornal
Fotografía
Teléfono
Radio
Televisión
Internet
Correo electrónico
Teléfono móbil
Redes sociais

Os medios de comunicación e nós

Tras este pequeno achegamento á evolución dos medios de comunicación, chega a túa quenda. Pensa nos programas de televisión e radio que máis che gustan e anótaos nunha táboa como a seguinte. Tamén podes incluír calquera outro contido audiovisual ou multimedia que acostumes ver e que non sexa emitido na televisión ou na radio, como vídeos de YouTube ou podcasts. Podes descargar a táboa en PDF ou en ODT.

Despois, comparte a información cos teus compañeiros e coas túas compañeiras e comparade as preferencias de cadaquén.

Tamén a podes descargar en ODT premendo aquí.

Agora comparamos

Despois desta reflexión individual toca comparar co que pensan os teus compañeiros e as túas compañeiras. En grupos de catro elaborade un mural cos programas e medios que máis vos gustan. Podedes escoller entre os seguintes formatos:

Gráfica de barras

Sobre unha cartolina de tamaño A2, debuxa dous eixos:

O eixo horizontal corresponderá aos nomes dos programas de televisión e/ou radio máis vistos e/ou escoitados de cada xeración.

O eixo vertical corresponderá ao número de persoas que ven cada programa.

Debuxa barras verticais tendo en conta o número de persoas que vían ou escoitaban os programas.

As barras máis grandes corresponderán a aqueles programas que teñen máis seguidores e seguidoras.

Circunferencias

Sobre unha cartolina, debuxa circunferencias tendo en conta que o seu tamaño debe ser proporcional ó número de persoas que ven e/ou escoitan cada programa.

Deste xeito, as circunferencias máis grandes corresponderán aos nomes dos programas de televisión e/ou radio máis vistos e/ou escoitados de cada xeración; e as circunferencias máis pequenas corresponderán aos menos vistos e/ou escoitados.

Colorea as circunferencias e escribe dentro de cada unha delas o nome do seu programa correspondente. Podes empregar unha mesma gama de cor e ir incrementando ou diminuíndo a súa intensidade en función da relevancia dos programas.

Mapa mental

Sobre unha cartolina, sitúa un título para o teu mapa mental no centro desta.

A continuación, escribe o nome dos programas de televisión e/ou radio recollidos nas enquisas.

Podes escribir ó lado do nome de cada programa o número de persoas que o vían e/ou escoitaban.

Une con frechas o título principal que situaches no centro da cartolina co nome dos programas que escribiches ó redor.

Nube de palabras

Sobre unha cartolina, escribe os nomes dos programas de televisión e/ou radio recollidos nas táboas.

Ten en conta que o tamaño dos nomes dos programas debe ser proporcional ao número de persoas que ven e/ou escoitan cada un de eles.

Así, os programas escritos con letras máis grandes serán os máis vistos e/ou escoitados de cada xeración e os programas escritos con letras máis pequenas serán os menos vistos e/ou escoitados.

Unha alternativa sería empregar unha páxina web para a creación da nube de palabras. Accede a nubedepalabras, un xerador de nubes de palabras en liña.

Retroalimentación

Podes consultar a rúbrica de avaliación para orientar o traballo.

Podes descargala en ODT desde aquí.

Licenciado baixo a Licenza Creative Commons Atribución Non-comercial Compartir igual 4.0