Definición:
Significa que unha persoa é fiel ou leal, é dicir, que alguén se sinte contento e satisfeito polo trato dado.
Exemplo:
Nesta tenda de bicis sempre me tratan moi ben. Arránxanme a bicicleta moi rápido. É unha boa forma de fidelizar clientes e facer que volvan.
Definición:
Ao revés, ao contrario.
Exemplo:
O avó tiña unha especial predilección polo neto, e viceversa.
A Helena gústalle patinar e a Diego gústalle correr, e viceversa.
Seguidamente poderás practicar con varias actividades, escolle unha das opcións e lograrás perfeccionar a entrevista.
Seguidamente debes ordenar os pasos a seguir para preparar unha boa entrevista.
Escribe un pequeno esquema no caderno, ou nunha folla, onde deixes ben claros os pasos a seguir para facer unha entrevista.
Podes buscar máis información na biblioteca escolar ou en Internet.
Esta actividade consiste en que escribas nunha folla o nome das persoas que che gustaría entrevistar. Ademais debes dicir algunha razón pola que che gusta especialmente e queres coñecer máis sobre ela.
Ao rematar, podes dar a coñecer os teus favoritos e as túas favoritas para ver cantas coincidencias co resto do alumnado existen na aula. Xa verás como hai moitas coincidencias!
Helena é unha gran influencer no ámbito da cociña. Imos facerlle unha pequena entrevista!
Entrevistador: Benvidos a “Sabores de Galicia”. Hoxe entrevistamos a Helena, unha influencer do ámbito da cociña. Para comezar, poderías presentarte brevemente para os nosos espectadores e as nosas espectadoras?
Entrevistada: Boas tardes. Son Helena, pero nas redes sociais fágome chamar “Cociñando con produtos de tempada”, e estou moi contenta de estar hoxe aquí no voso programa.
Entrevistador: Fantástico! Para saber máis sobre ti, poderías contarnos un pouco sobre a túa experiencia como creadora de contido? Como foron os teus comezos?
Entrevistada: Dende logo! A miña paixón dende pequena sempre foi a cociña. Cociñaba na casa e invitaba a comer as miñas amigas xa dende moi cativas. Elas foron as que me animaron a publicar algunha receita. Así que comecei compartindo as miñas receitas e trucos primeiro nun blogu e posteriormente a través das redes sociais. Quen me ía dicir a min que acabaría compartindo as miñas receitas con tanta xente!
Entrevistador: Cales dirías que foron os maiores desafíos que tiveches que superar para ser unha persoa coñecida nas redes sociais?
Entrevistada: Foron basicamente dous. O primeiro desafío foi aprender a falar en público sen atrapallarme, pois fago moitos vídeos en directo, iso sempre me puxo moi nerviosa; e o segundo desafío, o máis difícil, foi aprender a usar ingredientes novos para facer receitas innovadoras.
Entrevistador: Moi interesante. Agora, vouche preguntar pola túa comunidade de seguidores e seguidoras, como interactúas con eles e con elas?
Entrevistada: Pois preciso moito da súa retroalimentación. Intento ser clara e usar ingredientes para as miñas receitas que sexan de proximidade e se poidan mercar no comercio local. Por suposto preciso que me transmitan as súas inquedanzas para darlles resposta e que as miñas canles sexan interesantes para as persoas que me seguen. É moi necesario escoitalas para saber que cousas lles interesan.
Entrevistador: Grazas polas túas respostas, Helena. Para rematar, poderías compartir algún consello para aquelas persoas que queiran ser influencer coma ti?
Entrevistada: Claro que si. O meu consello é que sexan auténticos e auténticas e que estean sempre innovando porque é o que xera sempre novos seguidores e seguidoras e fideliza a aquelas persoas que xa tes. Moitas grazas por esta entrevista!
Practicamos unha entrevista!
Esta actividade consiste en traballar por parellas e facer unha entrevista. Tes que escoller a un compañeiro ou a unha compañeira de clase e facerlle unha pequena entrevista como se fora un ou unha youtuber famoso ou famosa. Primeiro, unha persoa toma o papel de entrevistadora e o outro o de entrevistada e viceversa, é dicir, despois intercambian os roles para estar nas dúas posicións.
Faille entre 4 e 5 preguntas sobre o que se dedica. Repasa o aprendido anteriormente e fala con boa entoación e educación.
A entrevista da actividade anterior, pode servirche de axuda, podes oíla cantas veces necesites.
Descubre ti mesmo ou mesma o teu grao de consecución da entrevista.
Puntúa cada criterio do 1 ao 5, sendo 1 pouco conseguido e 5 moi conseguido.
Podes descargar a táboa en: ODT
Licenciado baixo a Licenza Creative Commons Atribución Non-comercial Compartir igual 4.0