Reto número 2
Xa nos falta pouco para ter rematado o noso programa de radio. Ímolo completar cunha entrevista. Xa vimos que unha entrevista é unha forma de facer máis entretido un programa de radio porque lle damos voz a outras persoas que nos ofrecerán o seu punto de vista sobre o tema que estamos tratando. Ao mesmo tempo permítenos buscar e atopar información de interese que vai completar o que nós xa sabíamos.
Ao longo deste REA vimos como debemos preparar unha entrevista. Podedes lembralo no seguinte apartado. Agora imos poñelo en práctica para completar e acadar o reto final.
Lectura facilitada
Xa case temos listo o noso programa de radio.
Imos engadir unha entrevista para completalo.
Unha entrevista fai o programa máis divertido.
Damos voz a outras persoas.
Elas dan a súa opinión sobre o tema.
Tamén podemos atopar información interesante.
Esa información completa o que xa sabemos.
Xa aprendemos como preparar unha entrevista.
Agora imos facer unha para o reto final.
Audio
Bado di Pasos para preparar unha entrevista
Lembra o que vimos sobre os pasos que debemos dar para preparar unha entrevista.
Investiga previamente a persoa entrevistada
Busca información sobre a persoa a entrevistar. Aprende sobre a súa experiencia, logros ou calquera outra información relevante que che axude a formular preguntas.
Define obxectivos
Establece obxectivos claros que queres alcanzar. É dicir, que queres saber realmente.
Crea unha lista de preguntas
Baseándote na túa investigación e nos obxectivos da entrevista, elabora unha lista de preguntas.
Fai preguntas lóxicas e dinámicas, é boa idea resaltar positivamente os seus logros, para que a persoa entrevistada se sinta a gusto e poida responder comodamente.
Obtense moita información facendo preguntas usando: que, para que, como e cando.
Practica
Repasa as túas preguntas e practica a entrevista previamente, xa sexa en voz alta ou cun ou cunha colega. Isto axudará a familiarizarte co fluxo da conversación e a asegurarte de que estás preparado ou preparada para calquera dirección que poida tomar a entrevista.
Prepara o equipo técnico
Asegúrate de que todo o equipo técnico estea listo e funcionando correctamente. Se podes, ten material de reposto e revísao antes de comezar: gravadora de audio, cámaras, micrófonos e calquera outro equipo necesario.
Lectura facilitada
Primeiro, debemos investigar sobre a persoa que imos entrevistar.
Despois, temos que pensar que queremos conseguir coa entrevista.
Logo, creamos unha lista de preguntas.
As preguntas que empezan por que, para que, como e cando dan moita información.
Podemos repasar as preguntas en voz alta.
Por último, debemos preparar o equipo para gravar.
Debemos revisar a gravadora, as cámaras e os micrófonos antes de empezar.