Os medios de comunicación son canles ou plataformas a través dos cales se transmite información, noticias, entretemento e mensaxes a moita xente.
Estes medios son moi importantes na nosa sociedade, xa que inflúen na opinión pública e promoven o debate e a discusión.
Cada tipo de medio de comunicación ten as súas propias características. Os medios impresos ofrecen unha experiencia duradeira, é dicir, podemos consultalos durante varios días. Polo contrario, non nos ofrecen información de maneira inmediata.
Os medios como a radio ou a televisión ofrecen información de maneira instantánea. Ata fai pouco tempo non tiñamos posibilidade de volver a velos unha vez que xa rematara a emisión. Actualmente as plataformas de TV e os podcasts permítennos acceder aos contidos despois de emitidos.
×
Lectura facilitada
Os medios de comunicación son formas de dar información.
Tamén dan noticias e entretemento.
Chegan a moita xente.
Son moi importantes na nosa sociedade.
Axudan á xente a formarse unha opinión.
Tamén fan que a xente fale e debata sobre temas.
Cada medio de comunicación é diferente.
Os medios impresos son os xornais e revistas.
Podemos lelos durante varios días.
Pero non dan a información ao momento.
A radio e a televisión dan información ao instante.
Antes, cando remataba a emisión, xa non podías velo.
Agora, as plataformas de televisión e os podcasts permítennos velos ou escoitalos cando queiramos.
Audio
Esquema de comunicación
Lembra cales son os elementos que teñen que estar presentes para que se produza comunicación. Só hai comunicación se nos entendemos, é dicir, se a persoa emisora emite unha mensaxe cun código coñecido polo receptor ou pola receptora que chega a este a través dunha canle.
×
Sabías que...
As profesións nos medios de comunicación son moitas. Aquí hai algunhas profesións máis habituais:
Xornalista
Fai a investigación, redacción e reportaxe de noticias e eventos para diversos medios como periódicos, revistas, televisión, radio ou medios dixitais.
Presentador ou presentadora
Persoa que presenta noticias, programas de radio ou televisión, entrevistas e outros contidos para o público.
Persoa directora de fotografía
Responsable da composición visual e estética de películas, programas de televisión ou producións dixitais.
Persoa redactora de contido dixital
Crea e edita contido para sitios web, blogs, redes sociais e outras plataformas en liña.
Fotógrafo ou fotógrafa
Captura imaxes que se utilizan en medios impresos, dixitais, televisión ou cine para acompañar noticias, artigos ou programas.
Editor ou editora
Responsable de revisar e editar o contido creado por xornalistas, asegurando a precisión, coherencia e calidade do material.
Tamén os medios de comunicación poden clasificarse en diferentes categorías, que inclúen:
Medios impresos
Inclúen periódicos, revistas, libros e calquera forma de publicación impresa. Estes medios foron tradicionalmente unha fonte importante de información.
Medios electrónicos
Engloban a radio e a televisión, que transmiten información e entretemento a través de ondas electromagnéticas.
Medios dixitais
Inclúen sitios web, blogs, redes sociais e plataformas de noticias en liña.
