Definición:
Forzas. Coller folgos é coller forzas, descansar.
Exemplo:
Fixemos un descanso na camiñada para coller folgos.
Definición:
Listado de cousas que pertencen á mesma categoría.
Exemplo:
A mestra fixo unha enumeración das cousas que había que levar á excursión.
Os locutores e as locutoras de radio e TV, os e as youtubers e a maioría das persoas que teñen que falar en público, fano seguindo un guión escrito. Trátase de que a locución se faga coa pronunciación, a entoación e as pausas precisas para facilitar a comprensión das mensaxes.
Para facer un guión para un programa de radio é moi importante que escribamos os textos correctamente, só así os poderemos ler coa entoación e as pausas axeitadas. Non debemos esquecer pronunciar ben os diferentes sons, de non facelo así estaremos provocando confusións nas persoas que nos van escoitar.
Unha parte importante do guión é o que non se di, é dicir, as pausas. As pausas facilitan a lectura permitíndonos coller folgos para continuar ao tempo que contribúen a mellorar a comprensión do texto.
Ata agora vimos como facelas empregando puntos ou comas. Agora imos ver o emprego de outros signos de puntuación moi importantes á hora de escribir un guión dun programa de radio, xa que nos van permitir resaltar os contidos que nos interesan, facer pausas ou xerar expectación ante o que vai vir. Son os “:”, “;” e “...”
A maioría das persoas que falan en público fano seguindo un guión escrito, aínda que non se note.
Por iso teñen boa pronunciación, entoación e fan as pausas precisas.
Na radio ocorre o mesmo, cómpre facer un guión.
Tamén son importantes as pausas, xa que facilitan a lectura e melloran a comprensión.
A continuación explícanse o uso dos signos de puntuación como:
os dous puntos, punto e coma, coma e puntos suspensivos.
Por que son importantes as pausas? Fíxate como en moitos casos unha coma pode cambiar completamente o sentido e o significado dunha oración.
Seguidamente verás exemplos de oracións que teñen diferente significado segundo coloquemos as (,) comas:
Non, queremos saber a verdade.
Non queremos saber a verdade.
Imos comer nenos.
Imos comer, nenos.
Non quero máis.
Non, quero máis.
As pausas ao falar regúlanse cos signos de puntuación.
Son moi importantes para unha correcta comprensión.
Fíxate no uso da coma.
Os dous puntos serven para facer unha pausa e chamar a atención das persoas que escoitan anunciándolles que lles imos dicir algo que nos parece importante. Ao igual ca coma van pegados á palabra anterior e separados por un espazo da palabra seguinte.
Empregamos os ":" nos seguintes casos:
No partido de mañá xogarán: María, Antía, Carme e Xulia.
Para facer o biscoito precisamos: fariña, ovos e azucre.
Empregamos este recurso cando facemos un guión dun programa de radio para facer unha pequena pausa tratando de chamar a atención das persoas oíntes e dándolle importancia ao que vén a continuación.
E dixo Carla: “Temos que rematar o traballo hoxe”.
Breixo exclamou: “Estou esfameado!”
O incrible mundo dos animais: mamíferos e aves.
A ortografía: uso dos signos de puntuación.
Os dous puntos serven para facer unha pausa e unha chamada de atención.
Empréganse para:
Facer unha enumeración.
Destacar os títulos dos textos.
Para a comprensión dun subíndice.
Para reproducir palabras exactas que dixo unha persoa.
Eses tres puntiños que van seguidos teñen moita importancia no mundo da radio e os medios de comunicación, xa que permiten darlle ás mensaxes moita expresividade. Se miramos o guión dun programa de radio seguro que atopamos un montón, porque axudan a entender mellor a intención da persoa que está a falar. Explicamos o seu uso a continuación:
Cando queremos expresar que hai máis elementos pero non queremos explicar máis. Sempre se di que o tempo nos medios de comunicación é ouro, por iso debemos dicir só o imprescindible.
Exemplo: Era un bosque moi frondoso, había: carballos, castiñeiros, faias, teixos…
Se non chove pronto, non sei que pasará…
Se empregamos algún refrán ou frase feita que supoñemos que é coñecida por todos e todas.
Por exemplo: "Non poñas o carro diante dos ..." (bois) ou "Estás forte coma un..." (buxo).
Os puntos suspensivos engaden expresividade a unha frase.
Empréganse para expresar dúbida ou desexo, para continuar unha enumeración e para os refráns e as frases feitas.
O punto e coma emprégase para facer unha pausa un pouco máis grande que a coma. Aínda que non é un signo que se empregue moito vainos ser de moita axuda á hora de ler un guión dun podcast ou dun programa de radio xa que nos van permitir marcar diferencias entre as diversas partes dun texto.
Podemos usar o punto e coma para enumerar nunha lista onde xa hai comas entre os distintos elementos.
Exemplo:
Hoxe xogarán: de porteira Carme; na defensa Marta, Cristina, Noa e laura; no medio Paula, Antía, Mencía e Isa; como dianteiras Comba e Lola.
O punto e coma emprégase para facer unha pausa un pouco máis grande que a coma.
Tamén marca a diferencia entre dúas partes dun texto.
Licenciado baixo a Licenza Creative Commons Atribución Non-comercial Compartir igual 4.0