Cando mercamos un xornal ou unha revista estamos pagando un prezo moito máis baixo do que realmente custa producir ese xornal ou revista. Como se financia entón a prensa escrita? Unha poderosa fonte de ingresos para xornais e revistas é a publicidade gráfica.
No mundo da radio, a televisión, as redes sociais ou as canles de vídeo, a publicidade é tamén a principal fonte de ingresos.
A publicidade gráfica é unha forma de comunicación visual que ten un fin moi concreto: o de persuadir ó público para mercar un produto. Para iso emprega tipografías, imaxes e cores que chaman a atención e nos resaltan as vantaxes de determinados produtos.
Ollo con isto! Moitas veces a publicidade emprega estratexias ou transmite mensaxes que non son acordes coa realidade.
Un dos casos máis negativos que pode transmitirnos a publicidade é o emprego de imaxes estereotipadas, que atribúen uns determinados roles de xénero a mulleres e outros a homes. Fai anos era unha práctica moi común. Afortunadamente esta situación está mudando pero aínda queda moito por facer.