Ao longo deste recurso aprendiches moitas cousas sobre os medios de comunicación. Achegámonos un pouco ao seu funcionamento e traballamos coa súa ferramenta principal: a palabra.

As palabras son o elemento básico co que se realiza a comunicación e todos os traballadores e todas as traballadoras da prensa, da radio, da TV ou das redes sociais deben esforzarse ao máximo para empregar correctamente a linguaxe xa que, de non facelo, non van ser capaces de transmitir información.

O noso reto, como xa dixemos, vai estar relacionado co mundo da radio. En todo proceso de comunicación son moi importantes as palabras, pero sen dúbida na radio temos que empregalas moi ben porque non podemos servirnos dunha foto ou dun vídeo que apoie o que queremos dicir.

Ata agora estivemos vendo como mellorar a nosa maneira de empregar a linguaxe baseándonos sempre nun texto escrito que nos sirva de guión. Agora estás preparado ou preparada para gravar o teu programa de radio! Imos aló!