Ola oíntes de RadioPatio, aquí estamos de novo para tratar de axudarvos a escribir o guión do voso podcast.

Cando facemos o guión dun programa de radio ou dun podcast temos que escoller ben as palabras que imos empregar.

Lembra que as persoas que nos escoitan non nos están vendo e que, polo tanto, non poderemos empregar xestos nin imaxes para transmitir as nosas mensaxes.

Temos que pintar con palabras.

E de todas esas palabras, cal é a que nos fala de accións e nos informa de cando sucederon as cousas? O verbo, sen dúbida.

O verbo é tan importante que din os mestres e as mestras que é o núcleo do predicado. Moito lles gusta darnos a lata con termos raros!!!

Xa vimos noutro apartado deste REA como nos guións da radio ou dos podcasts debemos empregar normalmente verbos en tempo presente.

Agás, loxicamente, cando falamos de cousas que xa aconteceron no pasado.

Neste caso, nos tempos en pasado, temos que ter especial coidado con non cometer un erro que, cando o escoitamos, parece que nos fai doer os ouvidos: os tempos compostos.

En galego non existen!!! Non podemos dicir había chovido*, dicimos chovera, nin ha xantado* senón xantou. Non vos fixo dano nos ouvidos escoitar estas cousas raras? A min déronme arrepíos.

Lembrade! En galego non hai tempos compostos.

Ata a a próxima oíntes de RadioPatio.