O seguinte texto é un extracto dun informe presentado ante a Asemblea Xeral da ONU onde se plantexa a cuestión de Internet coma un dereito humano máis. Leámolo devagar para saber cal é a importancia que lle outorga a ONU a Internet e cales son as peticións que realiza aos gobernos do mundo en relación co acceso á Rede.
En vista de que Internet mudou nun instrumento indispensable para exercer diversos dereitos humanos, loitar contra a desigualdade e acelerar o desenvolvemento e o progreso humanos, a meta do acceso universal a Internet ha ser prioritaria para todos os Estados.
Cando se dispoña de infraestruturas de acceso a Internet, o Relator Especial alenta aos Estados a apoiar iniciativas encamiñadas a que todos os sectores da poboación, incluídas as persoas con discapacidade e as pertencentes a minorías lingüísticas, poidan acceder de maneira significativa a información en liña.
Os Estados deben incorporar a alfabetización en Internet nos programas de estudo e apoiar módulos de aprendizaxe semellantes en contornas extraescolares. Ademais da formación en aptitudes básicas, os módulos deben indicar os beneficios de acceder á información en liña, e a maneira de achegar información de forma responsable.
Informe do Relator Especial sobre a promoción e protección do dereito á liberdade de opinión e de expresión. Nacións Unidas. Asemblea Xeral. (16 de maio de 2011) Documento A/HRC/17/27
Reflexionemos sobre o contido deste texto, anotando as palabras e expresións que nos chamen a atención.
Cales son os dereitos humanos que podemos exercer a través de Internet?
Por que debe ser o acceso universal a Internet un obxectivo importante en todos os países do mundo?
En que consiste a infraestrutura de acceso a Internet?
Que colectivos poden precisar especial atención e deben ser incluídos nas iniciativas de promoción do acceso á información en liña?
Cales son as aptitudes básicas para acceder á Rede?
En que consiste a alfabetización en Internet?
A que se refire a ONU cando salienta a maneira de achegar información de forma responsable"?
Algunhas iniciativas de inclusión
Como é lóxico xa existen moitas iniciativas para levar Internet a distintos lugares do mundo por parte de todo tipo de organizacións. Consideremos algúns exemplos:
Institucións gobernamentais
Case todos os países teñen despregado algún plan ou estratexia para o desenvolvemento das súas infraestruturas de telecomunicacións, atendendo á inclusión dixital nos ámbitos: escolar, empresarial...
Non son poucas as ONGs que realizan programas para combater a exclusión dixital, entendendo que este fenómeno e un lastre para a mellora das condicións de vida de moitas comunidades.
Organismos como UNICEF ou a UIT da Organización das Nacións Unidas (ONU) ou o Banco Mundial teñen financiado e desenvolvido accións a prol da inclusión dixital.
Algunhas grandes empresas, sobre todo no ámbito das TIC, están a desenvolver importantes proxectos de investigación relacionados coa extensión do acceso global a Internet.
No marco do Programa Ligamundos entendemos a inclusión dixital coma un proceso que persigue unha mellora das condicións de vida das persoas e das súas comunidades. O equipamento técnico e o propio acceso a Internet deben complementarse coa capacitación das persoas para favorecer unha verdadeira inclusión. Son as persoas dacordo cos seus intereses quen deben recoñecer as súas propias capacidades e desenvolver as habilidades que permiten acceder dun xeito efectivo á información e ao coñecemento.
Reflexionamos e debatemos na aula:
Cales poden ser os motivos para que os distintos tipos de organización queiran estender o acceso a Internet?
Que obxectivos diferencian unha iniciativa pública coma o Programa Vive Digital de Colombia dunha iniciativa privada como é o proxecto Loon?
Que elementos debe ofrecer unha iniciativa de extensión para que poidamos falar de inclusión dixital?
Podemos identificar algunha destas iniciativas na nosa contorna?
