2.2.4 - Formas topográficas

Relevo terrestre

A zona terrestre non é uniforme, presenta diversas formas topográficas, que forman o relevo terrestre. As principais son:

• Montañas: grandes elevacións de terreo con fortes pendentes. Xeralmente seguen unha certa aliñación e forman un cordal, que se chama serra se é pouco extenso.
• Vales: zonas baixas situadas entre as montañas.
• Depresións: terras situadas por debaixo do nivel do mar.
• Chairas: terras chás ou suavemente onduladas, situadas a menos de 200 m sobre o nivel do mar.
• Mesetas: chairas situadas a máis de 200 m sobre o nivel do mar.

Relevo submarino

O fondo dos mares é moi accidentado e nel danse estas formas de relevo:

• Plataformas continentais: mesetas submarinas que se estenden desde a costa ata os 200 m de profundidade.
• Dorsais: cadeas de montañas baixo as augas. Ás veces os cumes emerxen e forman illas.
• Cubetas submarinas: depresións situadas entre os 2.000 e os 4.000 m de profundidade. Forman a maior parte dos fondos mariños.
• Fosas: zonas moi profundas e estreitas. A de Challenger (océano Pacífico) ten 11.521 m de profundidade.

Formas topográficas do relevo terrestre

Formas topográficas do relevo submarino

Cumes terrestres e fosas submarinas