1.1.4 - Biografía: Ramón María Aller Ulloa

O astrónomo inglés Percy Wilkins deu o nome de Aller a un cráter da Lúa, en recoñecemento dos grandes méritos do astrónomo galego, o crego Ramón María Aller Ulloa (1878-1966).

Este sentiu, desde neno, unha grande afección polas matemáticas e a astronomía. Construíu en Lalín en 1912 o primeiro observatorio astronómico de Galicia, considerado un dos máis importantes de España e de grande sona no estranxeiro polos traballos nel realizados. Ao ser nomeado profesor da Universidade de Santiago de Compostela trasladou o observatorio ao campus universitario.

Propuxo importantes modificacións para a mellora de instrumentos de observación astronómica e introduciu en España o estudo das estrelas duplas*. Escribiu varios libros –entre eles Introdución a la astronomía e Astronomía a simple vista– e multitude de artigos en revistas especializadas en astronomía. Dominaba dez idiomas.

Son de subliñar, á par dos seus grandes coñecementos científicos, as súas calidades humanas entre as que destacan a súa humildade e constante laboriosidade. Galicia enteira tributoulle unha homenaxe en Lalín erixíndolle unha estatua, obra do escultor galego Asorey.

i

• Estrelas duplas: ver glosario