2.1.8 - Clases de mapas

Pola magnitude do espazo representado, podemos facer esta clasificación:

• Mapamundi: representan o conxunto da superficie terrestre.
• Mapas xeográficos: representan unha superficie considerable do planeta, como un continente.
• Mapas estatais ou rexionais: os que representan España ou Galicia, respectivamente.
• Mapas topográficos: representan unha comarca.

Mapamundi Representa os continentes o os océanos. (século XVII)

Planos

Son representacións gráficas dunha superficie urbana ou de espazos moi reducidos.

• Os planos ou mapas catastrais representan extensións moi pequenas do terreo; indican camiños, lindes das terras, casas illadas, etc. Neles, un centímetro equivale a poucos metros na realidade.
• Os planos tridimensionais ou perspectivas permiten observar aspectos invisibles nos outros planos.

Tipos de mapas terrestres

Os mapas terrestres clasifícanse, segundo a información proporcionada, en:

• Mapas físicos. Representan con cores e símbolos os accidentes xeográficos naturais. Os mapas físicos didácticos expresan as elevacións do terreo mediante cores.
• Mapas políticos. Sinalan as divisións políticas e civís: estados, comunidades autónomas, nacións, provincias, cidades, vilas e aldeas. Os mapas políticos inclúen estradas, ferrocarrís, ríos e cordais. Os mapas de estradas son variantes do mapa político.
• Mapas temáticos: ofrecen información especializada sobre un tema. Poden ser económicos (agrícolas, industriais, de servizos), históricos, arqueolóxicos, xeolóxicos, meteorolóxicos e climáticos, hidrográficos, bioxeográficos, artísticos, gastronómicos, etc.

Plano do século XVIII

Os planos tridimensionais intentan representar as tres dimensións, por iso dan a sensación de perspectiva real.

Mapa temático: Galicia autonómica	Mapa temático: zonas vitivinícolas de Galicia