Sección deportiva (textos expositivos)

Neste apartado recolleranse todas as novidades relacionadas co deporte na nosa escola. 

Poderase falar dos partidos que se xogan nos recreos, das competicións entre os diferentes cursos, dos torneos de fútbol (e de baloncesto, balón prisioneiro ou calquera outro deporte que triunfe no teu centro). 

Tamén se poden contar aquelas actividades deportivas especiais que se celebran fóra do centro, como son as carreiras escolares ou os encontros deportivos con outros centros. 

Que tes que facer se che toca esta sección? 

1. Escolle unha ou dúas actividades deportivas que che gustaría destacar. Podes escoller aquelas nas que participaches ti ou os teus compañeiros e compañeiras. Por exemplo: un partido de fútbol no recreo, un torneo de brilé entre 5º e 6º, unha carreira popular na vila ou unha competición de xogos populares.

2. Escribe un pequeno texto informativo no que contes:

• Que actividade foi? (fútbol, baloncesto, balón prisioneiro, carreira, xogo da corda). 
• Cando se celebrou (día e hora). 
• Quen participou (os cursos, equipos ou persoas que xogaron).
• Cando se desenvolveu a actividade (se foi divertida, se houbo moita emoción, se foi un partido igualado…).
• Como rematou (quen gañou ou se houbo empate, se fixestes entrega de medallas ou diplomas, se quedastes con ganas de repetir…).

3. Engade fotos, debuxos ou unha pequena táboa, se é posible. 

• Unha foto dos equipos antes de comezar o partido. 
• Un debuxo dun momento especial do encontro. 
• Unha táboa onde se vexan os resultados dos partidos ou as puntuacións. 

Sección de receitas (textos instrutivos)

Neste apartado vamos converter o noso xornal nun receitario cheo de ideas deliciosas!

Podes escribir a receita dunha sobremesa que che guste moito, dunha merenda especial ou dun prato que prepares na casa coa túa familia.

Tamén podes inventar unha receita nova e darlle un nome divertido e orixinal.

Que tes que facer se che toca esta sección? 

1. Escolle unha receita que queiras compartir. Pode ser unha sobremesa (tortas, galletas, flan…), un almorzo rico, unha bebida refrescante ou incluso unha receita salgada.

2. Pon un título orixinal e atractivo. 

3. Escribe a lista de ingredientes que se precisan para facer a receita. Lembra indicar as cantidades!

4. Redacta os pasos que hai que seguir para preparar a receita. Faino de maneira clara e ordenada, numerando cada paso, para que calquera compañeiro ou compañeira poida facela na casa sen problema.

5. Coida a ortografía e a presentación. Lembra revisar as palabras, poñer maiúsculas onde corresponda e usar signos de puntuación. Se queres, podes engadir debuxos ou fotos da receita.

6. Podes incluír un consello ou curiosidade ao final.

Contando historias (textos narrativos)

Neste apartado podes inventar unha historia curta: pode ser divertida, de medo, de aventuras ou incluso baseada en feitos reais. A idea é converterse en escritores ou escritoras.

Que tes que facer se che toca esta sección?

1. Pensa unha boa idea para a túa historia.

• Que vai pasar? Unha viaxe ao espazo, unha casa encantada, unha carreira no fondo do mar, un día de neve en agosto…
• A quen lle pasa? Pode ser a ti, a un amigo/a, a un personaxe inventado ou mesmo a un animal con poderes máxicos.
• Por que lle pasa? Ten poderes máxicos, toma unha poción descoñecida, cae por un burato. 

2. Organiza a túa historia. 

• Introdución: Presenta os personaxes e o lugar onde sucede a historia. Por exemplo: “Había unha vez unha nena chamada Sara que vivía nunha pequena casa rodeada de bosques…”
• Desenvolvemento: Conta o que sucede, cal é o problema ou a aventura. Por exemplo: “Un día, Sara escoitou un lamento no bosque e decidiu ir investigar…”
• Final: Como remata a historia? Soluciona o problema, pecha a aventura ou deixa un final sorprendente e aberto, para que os lectores e as lectoras deixen voar a súa imaxinación. 

3. Usa verbos no pasado para contar o que pasou e introduce descricións para facer a túa historia máis interesante.

4. Revisa a ortografía e a puntuación para que se entenda ben todo o que escribes.

5. Ilustra a túa historia cun debuxo que represente o momento máis emocionante ou os personaxes principais.

Adiviña o que (textos descritivos)

Neste apartado imos practicar a nosa capacidade de observar e describir con palabras. A idea é que escollas algo ou alguén que che guste ou che chame a atención e escribas un texto no que contes como é, de xeito que calquera persoa que lea poida imaxinalo na súa cabeza sen velo.

Que tes que facer se che toca esta sección?

1. Escolle ben o que vas describir. Pensa nun lugar, persoa ou cousa que coñezas ben ou que che resulte interesante.

2. Observa con atención e anota nun papel todos os detalles que poidas.

• Como é? (cor, tamaño, forma, materiais…)
• Que aspecto ten? (se é suave, brillante, antigo, novo…)
• Que che fai sentir? (alegría, tranquilidade, medo, emoción…)
• No caso de que sexa unha persoa: como se comporta, como fala, que lle gusta facer…

3. Organiza o texto para que sexa fácil de ler e para que a persoa que o lea poida imaxinar perfectamente o que estás describindo. 

• Presentación do que vas describir.
• Descrición das súas características físicas.
• Descrición do que che fai sentir ou por que é importante para ti.

4. Utiliza adxectivos para facer a descrición máis rica e interesante.

5. Revisa a ortografía e a puntuación.

A nosa opinión (texto argumentativo)

Neste apartado imos aprender a expresar a nosa opinión por escrito, é dicir, contar o que pensamos sobre un tema e explicar por que opinamos así. É importante aprender a dar a nosa opinión de maneira ordenada, con argumentos e respectando sempre as ideas dos demais.

Que tes que facer se che toca esta sección?

1. Escolle un tema sobre o que teñas, tanto ti como os teus compañeiros e compañeiras, unha opinión clara. Por exemplo: “É mellor traballar en grupo ou individualmente?”, “Debería haber deberes todos os días?”, “Merecemos máis tempo de recreo?”.

2. Escribe a idea principal. No primeiro parágrafo, conta de forma clara o que pensas sobre ese tema.

3. Dá 2 ou 3 razóns para defender a túa idea. Explica por que pensas iso, poñendo exemplos ou argumentos que convenzan aos demais. 

4. Remata cunha conclusión ou cunha proposta. Pecha o texto resumindo a túa idea ou facendo unha suxestión.

5. Revisa a ortografía e a presentación antes de rematar.