Un xornal dixital debe ter contidos variados para que poida interesar a todo tipo de lectores: compañeiros e compañeiras, mestres e mestras, familias… E temos toda a seguridade de que o da túa aula será o máis orixinal e divertido que se fixo nunca na escola!
Iso si, para que quede ben organizado e completo, é fundamental decidir con claridade que seccións vai ter o xornal. Cada unha delas cumprirá unha función distinta: informar, entreter, recomendar ou contar cousas curiosas.
Así conseguirás crear un espazo dixital atractivo e cheo de contidos interesantes para quen o lea!
Sección de deportes (Texto expositivo)
Nesta parte do xornal imos recoller todas as novidades deportivas da escola. Poderás contar o que pasou nos partidos de fútbol ou baloncesto do recreo, as competicións que se fixeron no patio ou no ximnasio, as carreiras, os xogos tradicionais e calquera actividade relacionada co deporte.
Que facer se me toca esta sección?
1. Escolle unha ou dúas actividades deportivas que che parecesen máis divertidas ou importantes. Pode ser un partido de fútbol no recreo, un torneo de balón prisioneiro ou unha competición de carreiras de sacos.
2. Redacta un pequeno texto en LibreOffice Writer no que expliques con detalle o que pasou, quen participou, como foi o desenvolvemento do xogo ou actividade e quen gañou ou como rematou.
3. Podes engadir imaxes ou facer unha táboa cos resultados usando LibreOffice Draw, para que quede máis atractivo de ver.
Sección de receitas (Texto instrutivo)
Neste espazo poderás converterte en cociñeiro ou cociñeira e compartir unha receita especial para o resto da clase. Pode ser unha sobremesa doce, unha merenda saborosa ou unha receita típica que coñezas da túa familia.
Que facer se me toca esta sección?
1. Pensa e escolle unha receita que che guste moito, que sexa fácil de facer e que poida interesarlle aos compañeiros e compañeiras.
2. Pon un título creativo á receita, que sexa chamativo, como “Tortiñas máxicas” ou “Batido de cores”.
3. Escribe a lista de ingredientes que se van necesitar.
4. Explica con claridade os pasos que hai que seguir, para que calquera poida facer a receita sen dificultade.
5. Redáctao en LibreOffice Writer, coidando a presentación, a ortografía e organizando ben a información.
Contando historias (Texto narrativo)
É momento de deixar voar a túa imaxinación! Nesta sección poderás escribir unha historia inventada ou baseada nun feito. Pode ser unha aventura fantástica, unha historia misteriosa, un conto divertido ou algo que che pasou e que queiras contar.
.png "Conto (Arasaac)")
Que facer se me toca esta sección?
1. Pensa nunha idea para a túa historia. Que queres contar? Unha viaxe no tempo? Un misterio na escola? Unha carreira de bicicletas?
2. Escribe o texto en LibreOffice Writer, seguindo esta estrutura:
3. Usa verbos no pasado e emprega descricións que axuden a imaxinar como eran os lugares, as persoas ou os momentos da historia.
4. Ilustra a historia cun debuxo feito por ti ou polos teus compañeiros e compañeiras en LibreOffice Draw.
Describindo, describindo (Texto descritivo)
Nesta sección toca poñer a vista nos detalles e describir algo especial. Pode ser un lugar bonito da escola, unha persoa que coñezas ben ou un obxecto curioso da aula.
Que facer se me toca esta sección?
1. Escolle o que queres describir: pode ser un recuncho da aula onde xogades, unha planta que hai no patio, unha mascota da clase ou mesmo un profesor ou profesora.
2. Observa con atención todos os detalles: como é, que cores ten, que tamaño, que fai ou para que serve.
3. Anota esas características nun borrador para que non se che esquezan.
4. Escribe o texto en LibreOffice Writer e organízao de xeito que se poida imaxinar perfectamente o que describes, como se o estivesen vendo.
Sección de opinión (Texto argumentativo)
Este apartado é perfecto para que poidas opinar sobre algún tema que te interese ou che preocupe, e explicar por que pensas así. É importante aprender a expresar as ideas e a defendelas con argumentos.
Que facer se me toca esta sección?
1. Escolle un tema sobre o que teñas unha opinión clara. Pode ser sobre as tarefas para a casa, a importancia de reciclar, os recreos máis longos ou os videoxogos.
2. Escribe o teu punto de vista en LibreOffice Writer, dicindo que pensas sobre ese tema.
3. Engade 2 ou 3 razóns ou argumentos que expliquen por que opinas así.
4. Remata cunha conclusión ou unha proposta que sirva para pechar o texto, deixando clara a túa idea final.
