Así é, compañeiro ou compañeira, estás chegando ao fin deste gran tema, e é o momento de que te centres no máis importante: o reto final.
Neste punto catro será onde o leves a cabo pero, para iso, terás que poñerte de acordo cos teus compañeiros e compañeiras para decidir por cal vos decantades.
Recordas que se falou dos 3 retos no apartado 1.2 deste tema? Bótalle unha ollada para refrescar a memoria.
Enfoque multinivel
As diferentes opcións a elaborar son:
Opción 1: o xornal de aula en formato físico onde se inclúan cousas de interese da clase, da escola e da vida diaria, mesmo dando pé á creatividade a través da elaboración de contos e outras narracións.
Opción 2: o noso xornal de aula en formato dixital onde se inclúan elementos similares ó formato físico, pero facendo uso das ferramentas dixitais que están ó alcance do alumnado.
Opción 3: a nosa revista dixital onde, ademáis de textos e imaxes, se poderán engadir sons, vídeos e enlaces que farán o reto moito máis interactivo e divertido.
A partir deste momento traballar en equipo será máis importante que nunca. A cada grupo asiganaráselle unha sección do xornal ou da revista, en función do reto que se escollese na clase.
Cada persoa que o conforme deberá contar cun rol dentro do equipo, pois así o traballo será máis fácil, organizado e divertido!
É ben sabido que en ocasións nos toca adoptar tarefas que non son do noso agrado. Dentro do teu grupo, trata de que todos e todas estean contentos cos seus roles pero, no caso de non ser así, fala as cousas que seguro que falando aforrades moitas discusións innecesarias.
Rol a adoptar
Velaquí tes os posibles roles que podes adoptar:
Investigador ou investigadora
É a persoa encargada da procura de información e de imaxes sobre o tema que se vai traballar.
Pode buscar en Internet, pero sempre tendo en conta que non todas as páxinas webs son fiables. Por exemplo, Wikipedia, pode ser modificada por calquera persoa entón, a información que contén, non parece ser a mellor opción.
Para as imaxes, o máis recomendábel é a páxina web Arasaac. Arasaac contén pictogramas, que son imaxes de uso libre, é dicir, que pode empregar calquera persoa. Asemade, trátase de imaxes que facilitan que nenos ou nenas con algunha dificultade, comprendan mellor as cousas. Se te fixas, este tema está cheo de pictogramas!
Recorda: se che toca este labor, a información que escollas deberá ser clara e sinxela para que o resto do teu grupo a comprenda e, as imaxes, deberán axudar á comprensión desa información.
Redactor ou redactora
É a persoa encargada de escribir os textos do traballo.
Se che toca este rol, non te agobies! Contarás coa axuda e as contribucións do resto dos teus compañeiros e compañeiras, pois todos e todas deberedes estar de acordo co que publicades.
Para redactar a información, tes dúas formas:
Usando a “folla de recollida de ideas” do teu grupo, onde se anotan as ideas máis destacadas.
Escribindo directamente no teu ordenador, concretamente usando a aplicación LibreOffice Writer.
Deseñador ou deseñadora
Parabéns! Se che tocou este rol seguro que é porque es o máis creativo ou creativa do teu grupo!
A persoa encargada de deseñar é quen decide como se vai ver o traballo final. Pero... Tranquilidade! Tal e como acontece co redactor ou redactora, todos os membros do grupo deberedes achegar as vosas opinións, pois o máis importante é que todos e todas esteades satisfeitos co voso traballo.
Agora si, como deseñador ou deseñadora, deberás escoller:
As cores.
Os títulos.
Como situar as imaxes.
Os debuxos.
Se o traballo se leva a cabo no ordenador, podes usar o LibreOffice Draw para crear un deseño bonito.
Se o traballo se fai en papel, podes usar rotuladores, ceras de cores ou follas de cores.
O máis importante é que o traballo quede ordenado, bonito e fácil de ler.
Coordinador ou coordinadora
É a persoa que organiza todo o que se fai no equipo. O que non quere dicir que sexa o xefe ou xefa!
As súas funcións fundamentais serán:
Anotar quen fai cada cousa.
Apuntar todas as ideas que van xurdindo.
Comprobar se se están cumprindo todos os pasos.
Pode usar un caderno ou folla para escribir todo e así non esquecerse de nada.
De todos os xeitos, como coordinador ou coordinadora, o seu traballo tamén será axudar o resto de membros do seu equipo, encargándose de que estean organizados e o traballo se remate a tempo.
Lectura facilitada
Investigador ou investigadora
É a persoa que busca información e imaxes.
Pode buscar en Internet, pero non todas as páxinas son fiables.
Por exemplo, Wikipedia non é segura.
Para buscar imaxes, é mellor usar Arasaac, que ten debuxos chamados pictogramas.
Son fáciles de entender e calquera pode usalos.
Se che toca este traballo:
Busca información fácil e imaxes claras.
Axuda o grupo a entender mellor o tema.
Redactor ou redactora
É a persoa que escribe o traballo.
Non estás só ou soa, pois os teus compañeiros e compañeiras poden axudarte.
Podes escribir de dúas formas:
Usar a folla do grupo, onde están as ideas.
Escribir no ordenador, usando LibreOffice Writer.
Deseñador ou deseñadora
Se che tocou este rol, é porque es moi creativo ou creativa.
O deseñador ou deseñadora decide como vai quedar o traballo final.
Non estás só ou soa!
Todos e todas no grupo dan ideas e opinan.
Como deseñador e deseñadora, escolles:
As cores.
Os títulos.
Onde poñer as imaxes.
Os debuxos.
Se facedes o traballo no ordenador, podes usar LibreOffice Draw.
Se facedes o traballo en papel, podes usar:
Rotuladores.
Ceras de cores.
Follas de cores.
Adhesivos.
O máis importante é que o traballo quede: bonito, ordenado e fácil de ler.
Coordinador ou coordinadora
É a persoa que organiza o traballo do grupo. Non é o xefe ou a xefa!
O que tes que facer:
Anotar quen fai cada cousa.
Escribir as ideas do grupo.
Comprobar se se fan ben os pasos.
Podes usar un caderno ou unha folla para escribir todo e non esquecer nada.
