Poñendo en práctica todo o aprendido
Co obxectivo de amosar e compartir todo o que aprendiches ao longo desta unidade didáctica, cada grupo da clase deberá preparar unha pequena presentación.
Esta actividade servirá para aplicar os coñecementos adquiridos sobre as tipoloxías textuais (como os textos narrativos, descritivos, instrutivos expositivos ou argumentativos), os xéneros discursivos e a importancia de expresarse correctamente, tanto na parte escrita como na oral. Tamén permitirá reflexionar sobre o traballo realizado durante o proceso de creación dun xornal ou revista escolar, en que todos e todas participaron con esforzo e ilusión.
Durante a presentación, deberás organizarte co teu equipo, repartindo os diferentes roles para que cada membro do grupo poida expoñer unha parte do traballo. Todos e todas deben participar dalgunha maneira, pois a revista ou xornal que presentades é froito do traballo conxunto. Xa sexa lendo, explicando, mostrando materiais ou apoiando os compañeiros e compañeiras, é importante que cada persoa teña un papel na actividade.
Ten moi presente todo o que aprendiches sobre expresión oral e expresión corporal: falar con claridade, vocalizar ben, mirar ao público, usar un ton axeitado, manter unha postura correcta e transmitir seguridade. Todos estes aspectos contan á hora de facer unha boa presentación.
E, por suposto, non se pode esquecer unha das cousas máis importantes: respectar as intervencións das demais persoas. Cando sexa a quenda dos compañeiros e compañeiras, escoita con atención, en silencio e con interese, tal e como che gustaría que fixesen convosco cando vos toque falar a vós. Crear un ambiente de respecto e colaboración é fundamental para que todos e todas poidan gozar e aprender desta experiencia.
En resumo, esta será unha oportunidade perfecta para demostrar non só todo o aprendido, senón tamén como traballar en equipo, como comunicarse e como saber escoitar. Ánimo, será xenial!
Lectura facilitada
Cada grupo fará unha presentación para mostrar o que aprendeu.
Todos e todas debedes participar.
Falade con claridade e escoitade con respecto os compañeiros e compañeiras.
É unha boa ocasión para traballar en equipo.
