Cunchas e tentáculos

Características

Imaxina un animal que pode mudar de cor nun segundo, outro que fabrica perlas dentro da súa cuncha e outro que pode durmir durante meses sen moverse. Todos son moluscos. Prepárate para explorar o seu mundo!

O grupo do moluscos inclúe unha gran variedade de animais, pero a pesar de seren animais moi distintos todos gardan certas semellanzas como:

Corpo brando sen esqueleto interno.
Moitos deles, teñen o corpo cuberto cunha cuncha como os caracois e as ameixas.
Os terrestres como o caracol, respiran por pulmóns sinxelos mentres que os acuáticos, como o mexillón, respiran a través de branquias.
Teñen unha alimentación variada. Poden ser herbívoros (comen plantas, como os caracois), carnívoros (comen outros animais, como os polbos) ou filtradores (atrapan partículas da auga, como as ameixas).

Frechas sinalando diferentes partes dun caracol, un berberecho e unha lura. No caracol sinala cuncha, ollos sobre tentáculos e pé plano sobre o que repta. No berberecho, cuncha dobre, corpo brando e pé en forma de machado. Na lura, tentáculos e cuncha interna.

Lectura facilitada

Características dos moluscos:

O grupo dos moluscos inclúe unha gran variedade de animais, pero a pesar de seren animais moi distintos todos gardan certas semellanzas como:

• Corpo brando sen esqueleto interno.

• Corpo cuberto cunha cuncha.

• Os terrestres respiran por pulmóns e os acuáticos por branquias.

• Poden ser herbívoros, carnívoros ou filtradores.

Imaxe dun caracol con frechas sinalando:

• Cuncha

• Ollos sobre tentáculos

• Pé plano sobre o que repta.

Imaxe dun berberecho con frechas sinalando:

• Cuncha dobre

• Corpo brando

• Pé en forma de machado

Imaxe dunha lura con frechas sinalando:

• Tentáculos

• Cuncha interna

Audio

Sabías que?

Os polbos teñen tres corazóns e o seu sangue é azul?
As ameixas poden vivir máis de 100 anos e algunhas chegaron aos 500?
A lura xigante ten os ollos máis grandes do reino animal? Poden chegar ata 30 cm de diámetro, permitindo detectar presas na escuridade do océano profundo.

Tipos de moluscos

Existen tres tipos de moluscos:

Tipos de moluscos

Gasterópodos

É o grupo máis coñecido.
Agás as lesmas, teñen unha cuncha en espiral.
Posúen un pé plano sobre o que reptan.
Os seus ollos están sobre tentáculos.
Pertencen a este grupo os caracois e as lesmas.

Bivalvos

Posúen dúas cunchas chamadas valvas.
O seu corpo é brando.
Teñen un pé en forma de machado co que poden escavar na area.
Pertencen a este grupo a ameixa, o mexillón, o berberecho...

Fotografía duns berberechos — *Berberechos*

Cefalópodos

Presentan tentáculos para capturar ás súas presas.
Algúns teñen cuncha interna como as luras e outros non teñen cuncha, como os polbos.
Os seu pé é coma unha coroa de tentáculos con ventosas ou ganchos.
Pertencen a este grupo as luras, polbos, xibas...

Lectura facilitada

Hai tres tipos de moluscos:

Gasterópodos:

Teñen cuncha en espiral (menos as lesmas).
Móvense cun pé plano.
Ollos en tentáculos.
Ex: caracois e lesmas.

Bivalvos:

Teñen dúas cunchas (valvas).
Corpo brando.
Pé en forma de machado para escavar.
Ex: ameixas, mexillóns e berberechos.

Cefalópodos:

Teñen tentáculos con ventosas.
Algunhas especies teñen cuncha interna.
Ex: polbos, luras e xibas.

Audio

Descubrindo as cunchas dos moluscos

Tres cunchas : ameixa, berberecho e mexillón

Sabías que as cunchas non son todas iguais? Hai grandes e pequenas, lisas e rugosas, e cada unha pertence a un molusco diferente. Para coñecer mellor os moluscos e as súas cunchas, xunto co teu equipo, participarás en catro actividades moi divertidas rotando entre elas para que todas e todos poidades experimentar cada unha delas.

Como funciona?

Cada equipo comezará nunha actividade diferente.
Teredes quince minutos para explorar cada actividade.
Cando soe o sinal, cambiaredes á seguinte estación para que vos dea tempo a pasar por todas.

Así todas e todos aprenderedes e experimentaredes todas as actividades, e logo poderedes contar todo o que sabedes na exposición interactiva.

Preparadas e preparados para coñecer as catro actividades que ides facer?

Detectives de cunchas

Ides convertervos en verdadeiras e verdadeiros detectives mariños! As cunchas agochan moitos segredos e temos que clasificalas para descubrir a que molusco pertencen. Saberedes diferenciar unha cuncha dun mexillón da dun caracol? Teredes que observar, comparar e atopar as pistas correctas!

Artistas do mar

Sabiades que as cunchas poden ser obras de arte naturais? Agora tócavos a vós darlles cor e crear o voso propio deseño inspirado no mar. Podedes pintalas, facer cadros ou incluso inventar unha nova especie de cuncha mariña. Preparadas e preparados para deixar voar a vosa imaxinación?

Adiviña a cuncha

Ides poñer a proba o voso sentido do tacto! Meteredes dentro dunha caixa, cunchas misteriosas, pero non poderedes velas. Só con tocalas, teredes que describilas e adiviñar de que tipo de molusco poden ser. Seredes capaces de recoñecelas sen mirar?

Modelando cunchas

Que tal se creades as vosas propias cunchas? Recrearedes cunchas usando plastilina e exploraredes as súas formas e texturas. Poderedes facer caracois, ameixas, mexillóns e moito máis. E se vos atrevedes a inventar unha cuncha totalmente nova?

Lectura facilitada

As cunchas dos moluscos son todas distintas.

Xunto co teu equipo, vas facer catro actividades para coñecelas.

Cada equipo comezará nunha actividade diferente.

Teredes 15 minutos para facer cada actividade.

As actividades son:

Detectives de cunchas. Descubrir de que molusco é a cuncha.
Artistas do mar. Colorear cunchas, inventar unha cuncha ou facer cadros con elas.
Adiviña a cuncha. Descubrir que cuncha é metendo a man nunha bolsa.
Modelando cunchas. Facer cunchas con plastilina.

Audio

Ordena e aprende cos moluscos

As seguintes oracións falan dos moluscos, pero están desordenadas. Leas con atención e colócaas na orde correcta para formar un pequeno texto con sentido.

Os moluscos son animais invertebrados con corpo brando.
Moitos deles teñen unha cuncha que os protexe.
Hai tres grupos principais de moluscos: gasterópodos, bivalvos e cefalópodos.
Os gasterópodos, como os caracois, teñen unha cuncha en espiral e viven na terra ou na auga.
Os bivalvos, como os mexillóns e as ameixas, teñen dúas cunchas.
Os cefalópodos, como o polbo ou a lura, non teñen cuncha externa e son moi intelixentes.

Licenciado baixo a Licenza Creative Commons Atribución Non-comercial Compartir igual 4.0