O oso pardo galego e os seus amigos están en perigo, e queren que todo o mundo saiba por que precisan protección. Pero non poden facelo sós. Necesitan que se lles bote unha man! 

Entre toda a clase, ides axudalos a dar a coñecer a súa situación a toda a vosa contorna. Para iso, prepararedes unha exposición interactiva moi especial. Nela non só explicaredes que especies están ameazadas, por que motivo o están e que podedes facer vós para axudalas, senón que tamén as persoas visitantes poderán participar en xogos e actividades para comprender mellor a vida e os riscos aos que se enfrontan estes animais.

Será unha forma divertida e participativa de concienciar ao resto do cole e ás familias, que poderán aprender, xogar e reflexionar convosco para protexer a nosa fauna.

Pensade, investigade e usade toda a vosa creatividade para difundir o que lle está a acontecer a estes animais. O futuro do oso pardo e dos seus amigos depende de vós.

Estades preparadas e preparados para aceptar o reto?