Un dos momentos máis importantes do proxecto está a piques de chegar. Cada grupo teredes que presentar os carteis e os xogos, e axudar aos visitantes a descubrir por que é importante coidar os animais galegos en perigo de extinción.

Para que todo saia ben, debedes ter preparado por adiantado:

• Reparto das tarefas entre os membros do grupo: Repartide ben o traballo dentro do grupo para que todas as persoas participen. Establecede quen presenta cada cartel, quen explica os xogos e quen acompaña aos visitantes.
• Organización do tempo da exposición: É importante saber cantos minutos teredes para presentar os carteis e os xogos, e decidir canto tempo lles dedicará cada grupo.
• Espazo para preguntas e comentarios: Reservade un momento para que o alumnado e as familias poidan facer preguntas ou comentarios. Acordade quen do grupo terá a responsabilidade de responder.

Ao final da visita, convidaredes aos nenos, nenas e familias a escribir no Panel de Compromisos e Opinión. Neste panel, cada visitante poderá:

• Deixar escrito un compromiso ou unha acción que poida facer para coidar os animais e a natureza.
• Opinar sobre a exposición: que lles gustou, que aprenderon ou que lles gustaría facer para protexer aos animais.

Este panel serviravos para reflexionar, para ver que ideas teñen as persoas visitantes e para chegardes entre todas e todos a un compromiso colectivo de coidado da natureza.