Definición:
Razoamento que se fai para explicar unha cousa.
Exemplo:
A científica escribiu unha hipótese sobre o aumento da contaminación.
Definición:
Tan pequeno que só se pode ver cun microscopio.
Exemplo:
As bacterias son seres vivos microscópicos.
Coñeces os lévedos?
Pode que nunca escoitaras falar deles, pero están en moitos sitios e utilizámolos para producir alimentos tan importantes coma o pan. Trátase dun ser vivo unicelular, microscópico, do reino dos fungos, que produce a fermentación dalgunhas substancias. Por exemplo, para elaborar pan hai que mesturar fariña, auga, lévedo e un pouco de sal. O lévedo xera burbullas que producen coma resultado un pan máis esponxoso.
No microscopio dixital podes ver lévedos do pan ampliados 600 veces. Se queres velos máis preto, preme no microscopio.
A fermentación con lévedo é un proceso de obtención de enerxía e alimento a partir do azucre. En resumo: o lévedo utiliza o azucre para alimentarse; o resultado deste proceso xera o gas dióxido de carbono, tamén coñecido como CO2 ; este gas é o responsable de que o pan teña esas burbullas que o fan tan esponxoso.
Curiosidades
O lévedo tamén recibe o nome de fermento.
Na tenda podemos mercar preparados con lévedo para elaborar o pan.
Os lévedos son seres vivos que só podemos ver co microscopio.
Son necesarios para elaborar pan e outros alimentos.
Os lévedos fan a fermentación,
que se produce cando se alimentan do azucre.
Na fermentación xeran un gas.
No pan, o gas da fermentación fai ocos na miga,
por iso o pan está máis esponxoso.
O lévedo tamén ten o nome de fermento.
Nas tendas de alimentos venden lévedo
para facer o pan.
Disolve un pouco de lévedo en auga. Pode ser auga morna, pero non quente porque os lévedos están vivos e a auga moi quente pode matalos.
Pon auga na botella e mestúraa co azucre. Bota o lévedo con auga.
Uns minutos despois aparecen burbullas na auga da botella.
Tapa a botella co globo, ben axustado para que non escape o aire ou a auga.
Un consello: estira antes o globo varias veces para que sexa máis doado de inflar.
Co tempo o globo comezará a inchar, pode tardar uns minutos ou unhas horas.
Agora chega o momento de formular hipóteses.
Que sucedeu?
Cal é a causa?
Por que se forman burbullas na auga co lévedo?
Que pasará con maior cantidade de azucre? E se poñemos máis lévedo?
Afecta a temperatura da auga ao resultado?
Repite o experimento cambiando as condicións iniciais. Pesa diferentes cantidades de azucre e lévedo. Pon máis ou menos auga e a distintas temperaturas.
Unha boa forma de identificar os experimentos é utilizar globos de diferentes cores, ou marcar as botellas con etiquetas ou rotuladores.
Utiliza esta ficha en formato PDF para a investigación (nova xanela).
Aquí tes a ficha en formato editable.
Para esta investigación non necesitas un laboratorio. Os materiais que se utilizan son comúns e non precisas de medidas especiais de precaución.
Cando remates a investigación comparte os resultados, explica ao resto da clase como foi todo e os resultados do experimento. Tamén podes elaborar un resumo con fotos e compartilo en Internet. Lembra que nas fotos non deben aparecer persoas.
Licenciado baixo a Licenza Creative Commons Atribución Non-comercial Compartir igual 4.0