Estrutura e adaptación

Revisade ben a información dos manuais e lembrade que teñen unhas características concretas.  Aquí poñeremos un exemplo de estrutura para que vos poidades guiar. 

1. Necesitades escoller un título suxestivo para a portada do voso manual.	Por exemplo: con letras de tamaño grande, coloridas, sombreadas ou 3D.	O título definitivo pode ser decidido ao final do reto no caso de que vos custe decidirvos.
2. Ademais do título tedes que pensar nos apartados do voso índice e tamén da vosa introdución.	Por exemplo: se o voso manual é sobre o uso das pistas, haberá que facer unha introdución de para que vai servir o manual e os apartados que vai conter.	Exemplo introdución breve: con este manual aprenderás cando e como usar as pistas de fútbol da escola. Exemplo apartados do índice: localización das pistas, días de uso, condicións para uso...
3. Tamén podedes indicar os elementos necesarios para o resto de apartados.	Por exemplo: instrucións de uso das pistas, mantemento e coidado delas, a quen dirixirse en caso de problemas, información de seguridade para as pistas, precaucións... Que fará falta para o voso reto? Realizar unha enquisa pode axudarvos a obter información. Tedes axuda máis abaixo.
4. Como xa viches, para a elaboración do manual ides traballar en equipo. Lembrade que fixemos unha proposta de tarefas para cada integrante.	Por exemplo: cada persoa do grupo vai ser a encargada dunha parte concreta pero durante o proceso todas as persoas podedes dar ideas e facer modificacións.	Investigadora/investigador Deseñadora/deseñador Redactora/redactor Coordinadora/coordinador
6. Finalmente, como resultado, obteredes un manual que poderá ser exposto de distintas formas.	Por exemplo: en papel, de xeito dixital ou empregando un sistema mixto con códigos QR.

Contido

Debedes pensar que preguntas facervos para poder dar solución ao reto. Estas son algunhas que vos poden axudar:

• Cal é ou cales son as causas do problema?
• Podedes darlle solución sós e soas ou precisades axuda das mestras e dos mestres?
• Soluciónase só cambiando a organización ou ides precisar algo máis?
• Con quen tedes que falar para conseguir os cambios?

Por exemplo, se queremos mellorar o uso das pistas no recreo:

• Cal é ou cales son as causas do problema?:
  • Pois que sempre xogan os rapaces e as rapazas ao fútbol e non hai espazo para outros xogos.
• Podedes darlle solución sós e soas ou precisades axuda das mestras e dos mestres?
  • Podemos facelo sós e soas se falamos cos nosos compañeiros e coas nosas compañeiras.
• Soluciónase só cambiando a organización ou ides precisar algo máis?
  • Cambiando a organización xa podemos solucionar o problema. Por exemplo, cun calendario de uso das pistas.
• Con quen temos que falar para conseguir os cambios?
  • Se os compañeiros e as compañeiras aceptan as nosas propostas deberiamos falar coa directora ou co director do centro e coa xefa ou co xefe de estudos.

Cuestións específicas do voso reto

Aquí teredes que pensar moi ben que cuestións serán importantes. Seguramente as preguntas anteriores vos deron ideas, pero hai que ser máis concretas e concretos.

No exemplo anterior do uso das pistas algunhas cousas a ter en conta poderían ser: 

• Cando se usan esas pistas?
• Que grupos as usan?
• A que se xoga nelas?

Tamén debedes pensar en vocabulario específico relacionado coa vosa temática. Será moi útil para escribir os textos, polo que non estará de máis dedicarlle un tempo a pensalo e anotalo.

Posibles solucións ao problema.

• Que cousas se vos ocorren para dar solución ao problema. 
• Lembrade que no punto 4.1 fixerades propostas sobre este aspecto.
• Utilizade a folla de contidos que atoparedes máis abaixo para anotar eses textos.

O voso manual vai ser un documento que deberá estar nunha zona fácil de consultar e relacionada co problema que estades a solucionar.

Por exemplo, se estades a facer o manual para organizar mellor as pistas de fútbol deberiades deixar o manual o máis preto posible delas ou deixar un cartel indicativo de onde se pode consultar o manual de uso das pistas.

As normas de estilo e regras de ortografía

Xa vistes anteriormente a importancia das normas de ortografía. Tamén precisades coñecer e seguir normas de estilo e formato nun documento e, neste caso, no voso manual. 

A información do manual ten que estar ben organizada e ben presentada para que sexa fácil de entender.

A continuación, amósase unha serie de suxestións para mellorar estes aspectos:

Revisade a ortografía de cada parte lendo individualmente os textos para atopar os erros e logo poñede en común para corrixir

Repasade cada norma xeral ortográfica como: acentuación, puntuación, repetición de palabras...

Formato da letra: máis grande para o título, cores que destaquen, fondo claro, posible subliñado e letra grosa.

Emprego de instrucións adecuadas con formas verbais: imperativo, infinitivo ou presente.

Como vedes, son moitas as partes que tedes que ter en conta á hora de facer un manual.

Non dubidedes en pedir axuda a vosa mestra ou ao voso mestre en caso de dúbida.

Materiais

Aquí tedes un listado de materiais que podedes precisar para a elaboración do voso manual.

1. O voso ordenador, para a procura de información e poder gardala, buscar imaxes ou sacar fotos. Non esquezades planificar e anotar todas as imaxes, fotos ou cousas que precisaredes para inserir no voso manual.

2. Material funxible, como poden ser as cartolinas, papeis, rotuladores, tesoiras etc. 

3. Calquera outro material que consideredes oportuno para realizar o voso manual dixital ou en formato papel, cartolina... Por outro lado, pode ser interesante ter unha copia dixital na web do centro ou colgala nalgún repositorio de documentos e enlazala cun código QR para poder escanealo cunha tableta ou dispostivo móbil.