Cando usalas e como se escriben

Unha función é un bloque de código reutilizable que realiza unha tarefa específica.

Serve para dividir o programa en partes máis pequenas, facilitando a súa lectura, mantemento e reutilización.

Código Python: Estrutura básica dunha función

def nome_da_funcion(parámetros):  # Declaración coa palabra clave def
    # Bloque de código
    return resultado  # Devolve un resultado (opcional)

Función sen parámetros nin return

Primeiro, introduciremos unha función sinxela que non require entrada nin devolve resultado.

def saudar():  # Declarar unha función chamada "saudar"
    print("Ola! Benvidos á aula de Python!")  # Mensaxe ao usuario

# Chamar á función
saudar()

A palabra clave def indica o inicio da función.
O nome da función é saudar.
Dentro da función, hai unha única acción: imprimir unha mensaxe.
Para executar a función, usamos o seu nome: saudar().

Función con parámetros

Agora imos crear unha función que reciba datos como entrada (parámetros) e os utilice no seu bloque de código.

def saudar_usuario(nome):  # A función recibe un parámetro "nome"
    print("Ola,", nome, "! Como estás?")  # Usa o parámetro para saudar

# Chamar á función con diferentes valores
saudar_usuario("Eva")
saudar_usuario("Carlos")

A función ten un parámetro chamado nome.
Cando chamamos á función, debemos pasar un valor para nome, como "Eva" ou "Carlos".
O print emprega o valor de nome para personalizar a mensaxe.

Función que devolve un resultado co return

As funcións poden realizar cálculos e devolver o resultado cunha palabra clave return.

def sumar(a, b):  # A función recibe dous parámetros
    resultado = a + b  # Realiza a suma
    return resultado  # Devolve o resultado

# Chamar á función e mostrar o resultado
print("A suma de 3 e 5 é:", sumar(3, 5))

A función sumar ten dous parámetros: a e b.
Realiza a suma e gárdaa na variable resultado.
Usa return para devolver o valor ao programa principal.
Ao chamarmos sumar(3, 5), obtén o resultado e móstrao.

Explicación da diferenza entre función e método

Función: Un bloque de código autónomo que realiza unha tarefa.

Exemplo: len(lista) é unha función que devolve o tamaño dunha lista.

Método: É unha función asociada a un obxecto específico, e chamámola usando o formato obxecto.método().

Exemplo: "texto".lower() converte o texto a minúsculas.

Exemplos

Programa: Crea unha función que determine se un número é par ou impar e indique se é positivo, negativo ou cero.

Código Python: Programa que indica signo e paridade mediante unha función

def analizar_numero(n):  # A función recibe un número
    if n % 2 == 0:       #Se o resto de dividir por 2 é cero
        print(n, "é par.")
    else:
        print(n, "é impar.")

    if n > 0:            #Se é maior que cero
        print(n, "é positivo.")
    elif n < 0:          #Se non, se é menor que cero
        print(n, "é negativo.")
    else:                 #Se non é maior ni menor que cero
        print(n, "é cero.")

# Chamar á función con diferentes números
analizar_numero(4)
analizar_numero(-3)

O primeiro bloque if comproba se o número é par ou impar.
O segundo bloque analiza se é positivo, negativo ou cero.

Programa: Crea unha función para calcular o prezo final dun produto tras aplicar un desconto.

Código Python: Programa que calcula o prezo dun produto con desconto mediante unha función

def calcular_prezo(prezo, desconto):  # Parámetros: prezo e desconto
    prezo_final = prezo - (prezo * desconto / 100)  # Cálculo do prezo final
    return prezo_final  # Devolve o prezo final

# Programa principal
prezo = float(input("Introduce o prezo do produto (€): "))  # Pedir prezo á usuaria
desconto = float(input("Introduce o desconto (%): "))  # Pedir desconto á usuaria

# Chamar á función para calcular o prezo final
prezo_final = calcular_prezo(prezo, desconto)

# Mostrar o resultado
print("O prezo final do produto, tras aplicar o desconto, é:", prezo_final, "€")

Declaramos a función calcular_prezo que realiza o cálculo do prezo final.
A función recibe dous parámetros:
- prezo: O custo inicial do produto.
- desconto: A porcentaxe de desconto que se lle aplicará ao produto.
Calcula o prezo final usando a fórmula
Devolve o prezo final co return.