Material necesario

Mallas (malhas).

Son os obxectos que se lanzan. Deberán ter forma de disco e  están fabricados en aceiro ou ferro fundido, cumprindo as seguintes medidas:
Diámetro: entre 9 cm (mínimo) e 11 cm (máximo).
Peso: entre 600 g (mínimo) e 800 g (máximo).
Espesor no centro: uns 13 mm.
As mallas levan unhas marcas que as relacionan co xogador que as lanza.

Pinos, xinos ou vintes.
Deberán ser de madeira ou de plástico de forma cilíndrica e cónica na punta redondeados coas seguintes medidas:
Lonxitude: 18 cm.
Diámetro: entre 3 e 5 cm.
Lonxitude da parte cilíndrica: uns 13 cm dende a base.
Lonxitude das parte cónica: 5 cm ata o límite superior do pino.
Cada participante dispón de dúas mallas e un pino. 

Campo de xogo.
Modalidade profesional:
O campo e rectangular, a súa lonxitude debe ser de 36 metros e o ancho de 2,50 metros.
O espazo para lanzamento (espazo entre a liña de lanzamento dianteira e o límite traseiro) debe ter unha lonxitude mínima de 2 metros.
A distancia de pino a pino e de 34,30 metros.
Os pinos están enfrontados e nos campos oficiais colócanse dentro de cadanseu círculo. As veces debúxanse dous círculos concéntricos no medio dos que se sitúa o pino.

Modalidade tradicional:
O xogo admite variacións e non sempre se xoga de modo oficial, polo que se fan variacións:
O campo é de terra batida e os pinos colócanse a unha distancia de entre 15 e 20 metros.
Pódense substituír as mallas de ferro por outras de madeira ou mesmo por pedras planas.
As mallas márcanse con debuxos ou símbolos para identificalas.

 

Dinámica do xogo

O obxectivo do xogo é lanzar as mallas coa intención de derrubar o pino da outra cabeceira e/ou deixar a malla o máis preto posible daquel e así sucesivamente. É un xogo de lanzamentos e de puntería.

Formatos.

Individual: cada xogador ou xogadora colócase nunha cabeceira do campo para lanzar as mallas ao pino do contrario. Cando remata a quenda de lanzamentos cambian de cabeceira.

Parellas: cada parella nunha cabeceira do campo.

Dobres parellas: Os xogadores ou xogadoras colócanse por parellas en cada cabeceira, do mesmo xeito que os seus rivais.
A os 15 puntos intercámbianse os campos (cámbiase de pino).

Puntuación

Cada partido xógase a tres rondas (sets) de trinta puntos cada un, de xeito que se unha persoa participante ou equipo gaña os dous primeiros sets non é preciso xogar un terceiro e gañaría a partida. Só e necesario xogar un terceiro se hai desempate ao gañar cada xogador, xogadora ou equipo un dos sets anteriores.

Derrubar o pino do contrario son 6 puntos e gaña tamén a man (tira primeiro). Esta puntuación varía en función da zona xeográfica.
A malla máis próxima ao pino gaña 1 punto (nalgunhas zonas). Por ese motivo xorde a necesidade de identificar as mallas, pois hai puntos por proximidade.
O xogador ou xogadora non pode mover o pé dianteiro para lanzar, e ten prohibido pasar a liña de lanzamento.
Cando dúas mallas están á mesma distancia do pino e pertencen a equipos diferentes, emprégase a segunda malla para dilucidar os puntos por proximidade e o equipo gaña tres puntos.