Como xa sabes, a festa ten tres partes: danzas tradicionais, xogos e reto do cole animado.

O que vai en cada parte xa o temos decidido na fase anterior, agora toca buscar os espazos para practicar os xogos e as danzas. Esta decisión non é sinxela porque hai que ter en conta o tipo de xogos e comprobar que o lugar sexa o adecuado. 

Algunhas preguntas para escoller os sitios:

• O xogo necesita moito espazo? Un xogo de persecución precisa unha zona máis ampla que un xogo pintado.
• O xogo é de tirar obxectos pesados? Por exemplo o xogo da ra ou a chave non poden ir xunto a unha fiestra!
• No xogo poden ocorrer caídas? Pois mellor escoller un terreo de herba ou terra branda.

Decidide os sitios ideais para os xogos e as danzas. 

Un consello: creade un plano do lugar da festa e situade os diferentes espazos, así será máis doado facer o repartimento de xogos por zonas.

No plano tedes que marcar tres zonas:

• Zona A: espazo con xogos para o alumnado máis pequeno.
• Zona B: sitio cos xogos para o alumnado de maior idade.
• Zona C: espazo para xogo libre. Se non hai suficientes monitoras e monitores, podedes crear unha zona para xogos libres, a exposición de xoguetes ou explicacións-demostracións de persoas expertas (talvez xente da vosa familia)

Tedes que elixir ás persoas que farán de monitoras e monitoras en cada xogo. A proposta inicial é formar parellas para ocuparse de cada enredo; hai tanto traballo que se necesitan dúas persoas coordinadas para atender o xogo. Se non é posible podedes probar outras alternativas como deixar algún xogo cun monitor ou monitora, ou solicitar axuda do profesorado.

As funcións que se asignan ás persoas monitoras as tedes no apartado "Somos responsables" (preme para ir ao apartado)