Na seguinte sesión de Educación Física formaremos os equipos de traballo para preparar a festa do xogo.
Faremos os equipos cun xogo de botar as sortes. Non coñeces ningún? pois mira máis abaixo.
Cando teñamos os equipos repartiremos as categorías de xogos para facer a investigación.
Para o próximo día debes propoñer unha forma de botar as sortes para que a poidamos utilizar na clase.
Tamén podes preguntar na casa pola forma na que facían os sorteos nos xogos.
No apartado que explica os tipos de xogos [preme para acceder ao recurso] podedes atopar as tarxetas para repartir as categorías de xogos.
Cada equipo debe ter un nome que faga referencia a un xogo máis un adxectivo cualificativo. Por exemplo "Buxaina veloz".
Xogos de botar a sortes
Realmente non son xogos senón métodos que se utilizan para formar equipos, escoller ao que panda ou para decidir quen comeza o xogo.
As maneiras de botar a sortes son moi variadas aínda que as podemos agrupar en tres tipos:
De movemento
Son as que utilizan algunha forma de movemento, por exemplo "os pés". Un método de sortear na que dúas persoas enfrontadas avanzan paso a paso ata que se xuntan.
Outro exemplo é pares ou impares.
Con obxectos
Por exemplo co uso de paus pequenos ou garabullos de diferente tamaño que se ofrecen ás nenas e aos nenos que van xogar. A persoa que colle o garabullo máis curto é a que panda. Os garabullos son paus pequenos e delgados.
Tamén está neste grupo o xogo de botar unha moeda ao aire, xogo no que se ten que escoller entre "cara ou cruz?". Gaña a persoa que acertou o resultado.
Recitados
Unha persoa canta ou recita un pequeno poema.
Cancións de botar as sortes
Exemplos de cancións de botar as sortes
Nun café rifaron un gato,
un, dous, tres e catro.
Un, dous e tres,
zapatiño inglés.
A ver a quen lle toca
o número catro.
Barrabís
barrabás,
ti quedas e ti vas.
Lata, lata,
á redonda,
ao que lle toque
que se esconda.
Meu pai ten un caixón cheo de puntas dime ti cantas son. (a persoa sinalada di un número e se conta ese número de participantes) Un, dous, tres, ...
Lectura facilitada
Os xogos de botar a sortes son formas que se utilizan para facer equipos,
tamén se empregan para escoller ao que panda ou para decidir quen comeza o xogo.
As maneiras de botar a sortes son moi variadas aínda que as podemos agrupar en tres tipos:
De movemento: son as que utilizan algunha forma de movemento, por exemplo "os pés" ou pares e impares.
Con obxectos: por exemplo con paus pequenos ou garabullos de diferente tamaño que se ofrecen as nenas e nenos que van xogar, a persoa que colle o garabullo máis curto é a que panda. Os garabullos son paus pequenos e delgados.
Faremos os equipos cun xogo de botar as sortes. Non coñeces ningún? pois mira máis abaixo.