Xa formamos os equipos, coñecemos as categorías e fixemos o repartimento da categoría ou categorías que lle corresponde a cada equipo. O seguinte paso é seleccionar xogos de cada grupo para practicar na festa do xogo.

No teu equipo tedes que acordar os xogos que considerades máis adecuados para a festa. Hai que prestar atención ás características do xogo e comprobar que sexa posible practicar o devandito xogo na festa. Lembra que os xogos deben ser da categoría ou categorías que se asignou ao voso equipo.

Cousas que debes ter en conta do xogo:

• O número de persoas participantes.
• Se o xogo necesita un lugar específico para practicalo. Non vai ser posible facer xogos na auga!
• O material que precisa o xogo. Existe ese material no colexio? Podémolo conseguir ou fabricar?
• A duración. Os nenos e nenas pasarán por varios xogos e se hai algún que dura moito tempo, non poderán xogar a todos.
• A idade das persoas participantes.

Se o voso xogo non parece adecuado, aínda podes realizar adaptacións que fagan posible utilizar ese xogo na festa.

Dedicaremos as sesións de Educación Física a preparar a festa. Cada equipo debe presentar a súa selección de xogos e explicar a forma de xogar.

Podedes utilizar un modelo de documento para a descrición de cada xogo.

Documento modelo para describir o xogo en formato edición.

Documento modelo para describir o xogo en formato PDF (nova xanela).

Nos seguintes páxinas atoparás algúns exemplos de xogos de sempre,  de deportes autóctonos e algunhas danzas recomendadas para a festa do xogo. Tamén podedes atopar unha forma enxeñosa de adaptar un xogo para que se poida practicar con seguridade.