2.1 Características dos gases: presión, volume e temperatura

Características dos gases: presión, volume e temperatura

Os gases forman parte do noso contorno. O máis importante para nós é o aire, indispensable para respirar e, xa que logo, vivir, pero utilizamos este e outros gases habitualmente: cando inflamos os pneumáticos ou un globo, nas bombonas de butano ou de gas natural, os propelentes en pulverizadores e aerosois, nos circuítos dos frigoríficos, nas lámpadas...

Algunhas propiedades dos gases estudámolas na unidade didáctica anterior: non teñen volume nin forma fixa, son fluídos, espállanse por todo o espazo do recipiente en que están contidos. Deseguido afondamos na relación que hai entre a presión que exerce o gas, o volume que ocupa e a temperatura.

Volume dun gas

Como dixemos, os gases esténdense polo recipiente en que están. Así que o volume do gas é o volume do recipiente. Lembremos algunhas equivalencias entre unidades de volume:

Gas (óxido de nitróxeno) espallado por todo o recipiente	1 m3 = 1.000 litros
	1 dm3 = 1 litro
	1 cm3 = 1 mL

Presión dun gas

Xa sabemos que os gases exercen presión: a presión do aire dos pneumáticos, a atmosférica, a do gas dentro dun globo, etc. A presión dos gases mídese con aparellos que se chaman manómetros. Os manómetros que miden a presión atmosférica adoitan chamarse barómetros; o máis sinxelo é o constituído por un tubo vertical de vidro con mercurio no seu interior.

Manómetro	Barómetro

Hai moitas unidades para medir a presión. Damos as máis usadas e as súas equivalencias...

1 atm = 760 mm Hg = 101 325 Pa = 1013 mb

...onde atm é atmosfera, mm Hg é milímetro de mercurio, Pa é pascal (a unidade do sistema internacional), e mb é milibar, moi usada nos mapas meteorolóxicos.

Temperatura dun gas

Os gases, como todos os corpos, teñen temperatura, que se mide cun termómetro introducido no recipiente en que está o gas. Os termómetros que usamos habitualmente, como os clínicos, miden a temperatura en graos celsius ou centígrados (ºC). Pero o estudo dos gases require que utilicemos a escala do sistema internacional, a escala Kelvin. O cambio de graos celsius a kelvins, e viceversa, facémolo coa seguinte relación:

T_K = T_c + 273

Cal é a temperatura máis baixa (fría) posible. Pois é... cero kelvins, como tiña que ser!