1. Introdución

Descrición da unidade didáctica

Esta unidade denomínase "A comunicación". É recomendable que diariamente traballe con ela entre unha e dúas horas.

• Ademais, debe ter en conta as seguintes puntualizacións:

  • A unidade contén textos e exercicios en galego e castelán, separados en dúas partes ben diferenciadas. Ambas as linguas, xunto coa estranxeira, intégranse no ámbito da comunicación.

  • A unidade consta de dous tipos de textos ou contidos: uns que levan a etiqueta de "aspectos teóricos", que son os que debe comprender e memorizar, e outros que carecen desa etiqueta, que son os que debe ler, comprender e comentar (aparecen precedidos do símbolo ).

  • Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.

• Logo de rematada a unidade deberá ser quen de:

• • Comprender textos orais ou escritos de diversa procedencia.

  • Coidar adecuadamente o uso da lingua oral.

  • Distinguir as ideas principais e secundarias nos textos escritos.

  • Realizar, por escrito, narracións de experiencias vividas con claridade, coa estrutura e co rexistro axeitados, en soporte impreso ou dixital.

  • Utilizar os coñecementos sobre a lingua e as normas de uso lingüístico para mellorar a comprensión de textos escritos ou orais e para compor e revisar os textos propios desta unidade, en soporte tanto impreso como dixital.

  • Recoñecer e utilizar adecuadamente os signos de puntuación nos textos propios.

  • Distinguir entre palabras variables e invariables, así como as categorías gramaticais máis importantes.

  • Recoñecer a riqueza multicultural e a diversidade lingüística da sociedade actual, nomeadamente en España e en Galicia, respectalas e valoralas.

  • Coñecer a situación sociolingüística que se vive en Galicia.

  • Coñecer as características principais dos grandes xéneros literarios.

  • Desenvolverse de forma máis adecuada na capacidade de lectura e usar os coñecementos adquiridos sobre literatura para unha mellor comprensión dela e do mundo.