Cando pensamos en prensa, seguro que vos imaxinades o típico xornal grande de papel, en branco e negro, coma os que vían os nosos avós e avoas, verdade?

Iso era moi normal antes, pero agora a prensa cambiou moito! Eses xornais de papel dos que falamos, aínda existen, porén, e para adaptarnos aos tempos actuais, a prensa foise actualizando e agora podemos dispoñer deles en formato dixital a través de Internet (nos ordenadores, móbiles ou tabletas entre outros moitos dispositivos).

A prensa dixital é como ter o xornal as 24h do día dispoñible. Ademais, estes novos formatos permiten incluír acompañando as noticias, moitos máis vídeos ou imaxes que nos permiten facernos unha idea moi realista do que están a contar.

Pero... ollo que ás veces non todo son beneficios. É moi "guai" poder saber as cousas no momento no que acontecen, é dicir, de xeito "inmediato, xa!". Pero ás veces é preciso ter coidado co que lemos xa que pola necesidade ou demanda de sabelo todo no momento no que acontece,  os datos non se comproban con tanta minuciosidade e polo tanto... os erros e a falta de información aparece.

Pensade nesa prensa dixital da que estamos a falar. Sabedes dicir fontes onde atopala? E… saberiades diferenciar dentro de todos eses sitios aqueles que sabemos que contan a verdade e non se inventan cousas dos que si poden facelo ou é difícil comprobalo?

Aquí tendes a vosa seguinte misión ou tarefa. Debatede en gran grupo e completade o cadro que tedes a continuación seguindo o exemplo. Falade sobre fontes de información en liña e analizade e intercambiade opinións sobre a súa fiabilidade ou non.