Poderías dicir que ten en común a última copa do mundo de baloncesto, unha nova lei aprobada no Congreso de Deputados e o descubrimento dun novo ser que habita na frondosidade do Amazonas? A resposta é sinxela; o que estas tres cuestións teñen en común é que todas elas poden aparecer na prensa.

Os xornais, as revistas e incluso os blogs dixitais, son coma "fiestras" cara ó exterior que nos permiten coñecer todo o que está a acontecer no mundo e incluso fóra del! Estades a piques de adentrarvos no coñecemento e exploración dese "común xornal" que acostumades ver nos bares, casas e coles e convertervos en auténticos e auténticas xornalistas capaces de estar informados e poder así falar con coñecemento e xustificando as vosas opinións.

Para entender mellor ese concepto de "fiestra" e a súa importancia, imos viaxar no tempo e coñecer a fascinante historia da prensa.  A súa orixe remóntase a moitos anos atrás, cando a información era compartida dun xeito moi diferente e non estaba accesible para todo o mundo. Isto acontecía por diversos motivos que tedes escondidos a continuación, pero... poderiades debater a que nos podemos referir con ‘compartida dun xeito moi diferente’ e ‘non estaba accesible para todo o mundo’?

Coa invención da imprenta (do que falaremos en profundidade máis adiante) isto mudou. Empezou a ser posible a produción en masa (varios exemplares dun mesmo xornal) e con iso, as noticias comezaron a chegar a máis persoas. 

Os xornais foron os protagonistas á hora de contar e de de dar a coñecer ao mundo as guerras, descubrimentos, avances científicos e cambios na sociedade. Pero non só iso, en xornais e revistas aparte de noticias, podemos atopar con outro tipo de textos coma entrevistas, reportaxes, columnas de opinións etc. que nos amosan puntos de vista diferentes e nos invitan a reflexionar.

Con este percorrido histórico xa deberíamos ser conscientes da importancia da prensa así como coñecedores de que esta é un medio vivo moi importante que nos permite entender o que acontece preto de nós. Preparádevos! Comeza a vosa aventura, xornalistas.