Seguro que moitas veces usades Internet para buscar información, ver vídeos ou falar cos vosos amigos e amigas. Pero... notáchedes algunha vez que hai moitas cousas interesantes que vos interesan a vós, nenos e nenas, pero que non teñen presenza na rede? Se botamos un ollo ao noso arredor, aquí en Galicia (ou mesmo no noso concello, na nosa parroquia), vedes moitas noticias sobre vós ou sobre os temas que vos interesan e preocupan? E, ademais, vedes sitios nos que se faga en galego?

Os nenos e nenas na actualidade non teñen un sitio no que poder expresarse e falar dos temas que lles interesan, preocupan ou apaixonan. De feito moitas veces non son tidos en conta, a pesar de ter un rol moi importante na sociedade actual e sobre todo no futuro. 

Ademais, ás veces parece que o galego só se usa para certas cousas. Coma se non servise para falar de temas modernos, divertidos ou que nos interesan de verdade no noso día a día. Así pois, como podemos facer para que o alumnado teña unha voz e un papel importante nesta sociedade? Como podemos compartir as nosas ideas co resto do colexio, coas nosas familias e quizais con moita máis xente? E ademais, como podemos demostrar que o galego é unha lingua próxima para falar de todo o que nos gusta e nos rodea, tamén en Internet? Pois ides ser vós os que atopedes unha resposta a este problema. 

Ao longo desta situación de aprendizaxe seredes quen de crear un espazo no que dar voz aos nenos e nenas, que precisan ser escoitados e que teñen moito que dicir. Ao longo das próximas actividades e minirretos, descubriredes a importancia da comunicación do uso dun pensamento crítico e do uso da lingua nos medios, sendo estes unha peza fundamental da sociedade actual.