A continuación, tes varios exemplos de xogos e actividades de floorball, que podes empregar nas sesións de adestramento xunto ao resto de integrantes do teu equipo.
Os 10 pases
Entre os integrantes do teu equipo debedes conseguir realizar 10 pases sen que se vos escape a pelota. Para engadirlle dificultade, pódense facer dous equipos, mentres que un deles ten a pelota o outro intenta roubarlla.
Roubar a pelota
Xógase cunha pelota por cada parella. Unha das dúas persoas comeza tendo a pelota, mentres que a outra tenlla que intentar roubar sen facer contacto co stick da outra persoa. Cámbiase cando se rouba a pelota ou cando pasan 2 minutos.
O túnel
Todas as persoas do equipo menos unha colócanse en fila india e coas pernas abertas. A persoa que falta ten que pasar a pelota co stick polo medio das pernas da primeira persoa intentando que saia polo outro lado do "túnel" feito entre todos e todas.
Fuxe que fuxe!
Unha persoa do equipo ten que fuxir das demais, estas intentan golpearlle os pés coas pelotas de floorball empregando os sticks. Cando unha pelota impacta na persoa que fuxe, esta cámbiase coa persoa lanzadora que lle golpeou.
Slalom
Realízase un percorrido con material diverso de Educación Física (conos, picas, ladrillos etc) e márcase unha liña de saída. Cada persoa debe realizar o percorrido realizando un slalom conducindo a pelota co stick sorteando os obstáculos.
Que golazo!
Eliximos entre as persoas a xogar unha zona da portaría, por exemplo a parte inferior dereita. Faise unha fila e cada persoa intenta meter a pelota pola zona seleccionada. Unha vez que todo o mundo lanza, cámbiase a zona da portaría.
