No Paleolítico os humanos organizábanse en diferentes clans duns 20-40 individuos liderados por un xefe ou unha xefa do clan. O lar era a unidade social básica dentro do clan.

Varios clans formaban unha tribo e estaban unidos por vínculos como un antepasado ou unha antepasada común, crenzas, rituais ou lugares de culto e enterramento. Vivían nun mesmo territorio e existían relacións de cooperación para levaren a cabo as diferentes actividades.

Mais a convivencia non sempre era pacífica. Ás veces había enfrontamentos entre clans dunha mesma tribo.

Parece que no Paleolítico homes e mulleres podían desempeñar funcións semellantes nos grupos: elaborar útiles, cazar e recoller, entre outras. Seguramente foi o período máis igualitario da Prehistoria.

Pero a vida era difícil no Paleolítico. A esperanza de vida non superaba os 30 anos e a mortalidade era moi alta.

Pensa que hoxe a esperanza de vida que temos ronda os 80 anos... máis do dobre!

No Neolítico, e como consecuencia da aparición das novas actividades económicas e do excedente, xurdiu unha organización social máis complexa.

1. A actividade económica determinaba a posición na xerarquía social. Por exemplo, as persoas que se dedicaban ao comercio tiñan un status social máis elevado.
2. A propiedade da terra tamén marcaba o nivel social. No cumio estaban as persoas propietarias.
3. Xorde a especialización laboral. Algunhas persoas dedicáronse á produción de alimentos, mentres que outras se orientaron cara á artesanía, a administración ou a relixión.
4. Asentáronse as diferenzas sociais entre os homes e as mulleres. Isto documéntase no rexistro arqueolóxico.

Coa aparición da metalurxia deuse unha maior especialización e diversidade no traballo. Isto provocou o aumento das diferenzas sociais, tamén por sexos.

As mulleres ocupábanse dos labores agrícolas e do fogar. Os homes encargáronse do traballo relacionado coa metalurxia e o manexo das armas. 

Estableceuse unha xerarquización social que deu lugar á formación de sociedades complexas e patriarcais.  

As diferenzas sociais reflíctense no enxoval das sepulturas, algunhas delas moi ricas: inclúen carros, gando, xoias, armas, cerámicas e obxectos persoais como peites.