A vida na Terra é posible grazas a unha combinación de factores clave.
Estes son:
A distancia da Terra ao Sol.
A atmosfera que nos protexe contra a radiación solar.
A presenza de auga en diferentes estados, elementos químicos básicos ou un campo magnético.
Estes factores, xunto co desenvolvemento de ecosistemas que permiten a reciclaxe de materia e enerxía, crearon e mantiveron as condicións necesarias para que a vida floreza no noso planeta.
Lectura facilitada
A vida na Terra é posible porque temos o Sol moi cerca ou unha capa chamada atmosfera que nos protexe dos seus raios.
Por suposto temos auga, fundamental para vivir, e un campo magnético invisible arredor do planeta que manda aos asteroides lonxe de nós.
As plantas tamén son importantes, xa que son capaces de renovar o aire que respiramos.
Todas estas cousas fan posible a vida na Terra.
Audio
Para saber máis...
Se queres descubrir as claves da vida na Terra, preme na seguinte ligazón de Dixit.
Le con moita atención e serás quen de contestar as seguintes cuestións como se traballaras na Axencia Espacial Europea.
Cóntoche un conto
Ola nenas e nenos, preséntome! Son María Montessori, unha mestra italiana.
Tiven unha escola, a Casa dei Bambini, onde inventei unha nova forma de ensinar.
Nas miñas clases sodes vós os que tomades importantes decisións sobre a vosa aprendizaxe, e todos din que os materiais que usamos son súper chulos!
Gustaríame traballar un pouquiño con vós, sobre o Universo e o voso lugar no mundo... Acompañádesme?
Comecemos por unha pequena pero emocionante historia…
Lección de humanidade
Ao principio a Terra era unha bóla de lume. E isto prolongouse durante moito, moito tempo.
A Terra estaba cuberta de volcáns. Chegaron as choivas. Choveu e choveu. E isto prolongouse durante moito, moito tempo.
Finalmente a Terra comezou a arrefriarse. Aínda así, non había vida na Terra, só rochas, océanos e volcáns.
Había só rochas, auga e lume. Nada verde. E isto prolongouse durante moito, moito tempo.
A Terra é moi antiga!
As primeiras formas de vida foron organismos moi simples: bacterias e algas, que produciron osíxeno.
Co tempo, a vida foise facendo máis complexa, aparecendo os primeiros organismos pluricelulares, como medusas e vermes.
A continuación os primeiros invertebrados no mar, como moluscos e crustáceos, e os primeiros vertebrados, que foron os peixes .
As plantas adaptáronse ao novo medio chegando a formar paisaxes de grandes bosques de árbores e fentos xigantes.
Cando aparecen as plantas con flores, tamén o fan os primeiros insectos, e todos sabemos o importantes que son estes bichiños para o ciclo de vida das plantas.
A transición da vida acuática á terrestre marcou un momento evolutivo crucial.
A partir deses primeiros seres que conquistaron o chan terrestre desenvolvéronse anfibios, réptiles, aves e mamíferos.
Tras a extinción dos dinosauros, os mamíferos evolucionaron rapidamente dando lugar a moitas especies distintas.
Unha desas especies, os primates, serán os antecesores dos primeiros homínidos e estes, do Homo Sapiens, que por se non vos soa, sodes vós!
Lectura facilitada
Ao principio a Terra era unha bóla de lume.
Estaba cuberta de volcáns.
Pouco despois chegaron as choivas.
Finalmente a Terra comezou a arrefriarse.
As primeiras formas de vida foron bacterias e algas.
Evolucionaron en medusas e vermes.
A continuación apareceron no mar os primeiros seres vivos sen ósos.
Estes seres son os invertebrados.
Son invertebrados os moluscos e os crustáceos.
Despois apareceron os vertebrados.
Os vertebrados teñen ósos.
Son vertebrados os peixes.
As plantas formaron grandes bosques de árbores e fentos xigantes.
Os primeiros seres que conquistaron o chan foron os anfibios, réptiles, aves e mamíferos.
Tras a desaparición dos dinosauros, os mamíferos evolucionaron rapidamente dando lugar a moitas especies distintas.
Unha delas, os primates, serán os antecesores dos Homo Sapiens.
Os seres humanos somos Homo Sapiens.
Audio
Visita a túa biblioteca
A biblioteca é unha gran fonte de información.
Nela poderás encontrar moitos contos e literatura de tipoloxía informativa.
Animámoste a visitar a túa biblioteca e mergullarte en libros relacionados co tema.
E ti que opinas?
Seguro que levaches máis dunha sorpresa a medida que avanzabas na túa investigación sobre a vida na Terra.
Reflexiona na túa libreta sobre as seguintes cuestións:
Que opinas do tempo que levamos na Terra se o comparamos por exemplo coas plantas ou seres vivos menos complexos?
Se botas unha ollada arredor, seguramente observarás a presenza do ser humano practicamente por todas partes... Cres que a pegada do home na Terra é maior que a do resto de seres vivos? Razoa a túa resposta.
