Durante a maior parte da historia da humanidade a maioría da poboación dedicábase á gandaría e á agricultura. Era necesario, porque sen maquinaria todo o traballo se realizaba a man. Pero desde a revolución agraria e industrial isto cambiou. As máquinas empezaron a facer o traballo que antes realizaban os humanos, e miles de persoas xa non tiñan emprego no campo. Entón iniciouse unha emigración masiva ás cidades -o éxodo rural-, que empezaron a medrar a ritmo acelerado. Canto máis tardaba un país en mecanizarse e modernizarse, máis tarde comezaba o seu proceso de crecemento urbano.

No seguinte gráfico podes ver a porcentaxe de poboación que vive en áreas urbanizadas por continente desde 1500 a 2023, e observarás estes diferentes ritmos de urbanización.

Para agrandalo, preme enriba da imaxe.

Hoxe seguen persistindo as diferenzas: nos países menos desenvolvidos aínda moita xente traballa no campo e vive en pequenas vilas e aldeas. Son os que teñen menores porcentaxes ou taxas de poboación urbana. En cambio, os países máis desenvolvidos teñen as máis altas, como podes ver neste mapa con datos de porcentaxe de poboación urbana por países en 2018.

Para agrandalo preme enriba do mapa.

Neste mapa podes ver as diferentes partes do planeta tal como se ven desde o espazo de noite. As áreas máis iluminadas son as máis urbanizadas. É unha boa maneira de achegarse á distribución da urbanización no planeta. Se o comparas co mapa anterior verás as coincidencias.