Agora toca profundar un pouco máis. Ides traballar máis polo miúdo tres aspectos de grande importancia para poder coñecer o funcionamento do mundo no que vos tocou vivir. Como xa se dixo: a xeografía da poboación, a xeografía urbana e as desigualdades existentes e como a cooperación pode axudar a corrixilas. 

Seguindo os contidos que se vos propoñen, seredes quen de saber como se distribúen as persoas no planeta, que son e como se organizan as cidades e cales son os desafíos globais que temos que enfrontar e, loxicamente, que medidas se poden adoptar para poder superalos.

Os quefaceres que deseguido ides iniciar vanvos axudar a comprender moito mellor a realidade que vos rodea e tamén vos van desafiar a pensar e actuar. Lede con atención e de maneira reflexiva os textos, realizade todas as tarefas propostas con entusiasmo e completade o reto final, xa que vos permitirá poñer en práctica todo o aprendido.

Preparádevos para descubrir e aprender de xeito áxil e colaborador.

Imos aló.