DESEÑO DUNHA PIRÁMIDE DE POBOACIÓN

Unha pirámide de poboación é un gráfico que nos dá información sobre a estrutura por idade e sexos dunha poboación e tamén dos seus acontecementos demográficos máis destacables: no seu perfil os entrantes indican perdas de poboación (epidemias, guerra, emigración...) e os saíntes incrementos (inmigración, crecemento económico...).

Preme enriba da imaxe para vela ampliada:

1. Tendes que procurar os datos necesarios como os que, por exemplo, figuran na seguinte táboa (Datos de homes e mulleres dende 0 a 90 e máis anos organizados por grupos quinquenais).

Podedes recorrer a numerosos enderezos electrónicos, por exemplo:

• De Galicia: Preme aquí para acceder aos datos. 
• De España: Peme aquí para acceder aos datos.
• Do resto do mundo en Datosmacro.com: Éntrase na páxina, selecciónase un continente e logo o país do que nos interese coñecer os datos. Preme aquí para acceder a eles.

2. Trazade dous eixos: Pódese facer nun folio pero é moito máis doado que o fagades con papel milimetrado, quedará mellor.

• No de ordenadas (vertical) situade os grupos de idade de 5 en 5 anos.
• No de abscisas (horizontal) debuxade as barras que representen o total, ou a porcentaxe, da poboación que existe en cada grupo de idade. Recordade que deberedes poñer os datos referidos aos homes á esquerda e os das mulleres á dereita.
  (Resultaravos máis doado empregar os datos en porcentaxe, para iso deberedes aplicar a seguinte fórmula:

Cantidade de homes ou de mulleres dun grupo de idade determinado/Poboación total) x 100.)

COMENTARIO DUNHA PIRÁMIDE DE POBOACIÓN

Para facer un comentario deste gráfico podedes seguir un guión como o seguinte.

1. Identificación do gráfico:
(Gráfica de barras que representa a estrutura por idade e sexo dunha poboación.
Ten dous eixos. No vertical reflíctense os grupos de idade (de 5 e 5 anos: 0- 4, 5 – 9…). No horizontal, ben en números absolutos ben porcentualmente, o total da poboación. Toda a información referente ás mulleres sitúase no lado dereito e a dos homes no esquerdo.

2. Estrutura por sexo:

• Que sexo predomina?
• Que sucede na base da pirámide?
• Que reflicte a cúspide?
• Cando se equilibran os totais de homes e mulleres?

3. Estrutura por idade:

• Que grupo de poboación predomina (mozos, adultos, vellos)?
• Que forma ten a pirámide? Expansiva (predomina poboación nova); estancada (predomina poboación adulta ou regresiva (predomina poboación vella).

4. Episodios demográficos máis salientables:

• En que grupo de idades hai entrantes ou saíntes (falan respectivamente de perdas e de ganancias de poboación).
• De saber as causas das irregularidades deberedes explicalas.

5. Proxeccións de futuro. De manterse a situación que podería pasar no futuro?