Cando o ser humano se fixo sedentario, hai uns 10.000 anos, apareceron as primeiras cidades. Ao principio eran pouco máis que aldeas grandes, rodeadas pronto de murallas para defenderse de ataques inimigos. Xa viches que durante a maior parte da historia da humanidade a poboación crecía lentamente, e así o facían as cidades. Algunhas chegaron a ser moi grandes, como a Roma Antiga, pero a meirande parte tiñan un tamaño reducido, cuns límites ben definidos, e entre elas estendíase o campo coas súas aldeas e vilas, nos que vivía a maior parte da poboación. O gran proceso de cambio que foi a revolución industrial, agraria e demográfica modificou radicalmente a situación. Non só a poboación urbana se multiplicou e o tamaño dos núcleos urbanos aumentou espectacularmente, senón que os modos de vida urbanos se espallaron por todo o territorio.