Fase 1: Absorción de substancias

As plantas absorben auga e sales minerais polos pelos absorbentes da raíz. A mestura destas dúas substancias chámase zume bruto. O zume bruto ascende polos vasos leñosos do talo e chega ata as follas.

Planta enterrada coas raíces á vista e frechas vermellas que representan a auga e as sales minerais subindo desde as raíces ata as follas

As follas absorben dióxido de carbono a través dos estomas. Os estomas, son uns buratos pequeniños que están situados na parte inferior das follas, no envés. Os estomas, poden abrir e pechar e comunican co exterior.

Debuxo dos estomas dunha folla con frechas azuis enfrontadas na esquerda representado os estomas abertos e en direccións contrarias, na imaxe da dereita representando os estomas pechados — *Estomas abertos Estomas pechados*

Sabías que os estomas son tan pequenos que non se ven a simple vista, pero, cun microscopio, podes observalos e ver como abren e pechan dependendo do ambiente?

Lectura facilitada

As plantas absorben auga e sales minerais pola raíz.

A mestura de auga e sales minerais chámase zume bruto.

O zume bruto vai polos vasos leñosos do talo ata as follas.

As follas absorben dióxido de carbono polos estomas.

Os estomas, son uns buratos pequeniños que están situados na parte inferior das follas.

Debuxo dos estomas dunha folla con frechas azuis enfrontadas na esquerda representado os estomas abertos e en direccións contrarias, na imaxe da dereita representando os estomas pechados

Só poden verse cun microscopio.

Facemos sostible o noso horto

Acabamos de ver que as plantas dependen da absorción de substancias para medrar e desenvolverse. Para mellorar esta absorción de xeito eficiente e sostible, propoñémosvos:

A fabricación dun composteiro, que converta os residuos orgánicos en abono natural (compost), para mellorar a calidade do solo e facilitar a absorción de nutrientes e de carteis de orgánico para poñer nas clases.
A fabricación dun sistema de rego ecolóxico, usando auga de chuvia e recipientes reciclados, para asegurar que as plantas reciban a auga que necesitan de forma eficiente.

Composteiro verde aberto con ramas e unha pa e regadeira vermella.

Para facelo, dividirémonos ao chou en dous grandes grupos: un fabricará o composteiro e o outro o sistema de rego.

Fabricamos un composteiro

Ides deseñar e construír un composteiro para converter os residuos orgánicos en abono natural e, así, nutrir ás plantas. Podedes seguir estes pasos:

1. Pensade distintas formas para construír o composteiro.

2. Buscade materiais de uso diario que poidades usar.

3. Anotade o material necesario para crealo.

4 Traede os materiais ao cole.

5. Hora de crear!

Fabricamos un sistema de rego ecolóxico

Ides deseñar e construír recipientes para almacenar auga de chuvia e regadeiras para regar as plantas sempre que o precisen. Podedes seguir estes pasos:

1. Pensade distintas formas para almacenar a auga da chuvia no cole.

2. Buscade materiais de uso diario que poidades usar para transformalos en regadeiras.

3. Anotade o material necesario para crear o depósito de chuvia e as regadeiras.

4. Traede os materiais ao cole.

5. Hora de crear!

Necesitades algunha idea?

Ideas para crear un composteiro

Con caixas plásticas recicladas

Materiais: dúas caixas plásticas grandes con tapa, un punzón para facer buratos, terra ou compost inicial.

Dúas caixas de plástico, un punzón e terra

Procedemento:

1. Fai pequenos buratos nas paredes e na base dunha das caixas para permitir a ventilación e a saída de auga.

2. Coloca a caixa con buratos dentro da outra para recoller líquidos.

3. Enche a caixa con buratos con terra e restos orgánicos como froitas, verduras e follas secas.

4. Decora a caixa con debuxos ou mensaxes sobre a natureza (opcional).

Con botellas de plástico

Materiais: botellas de plástico grandes (mellor as de 5 litros ou máis), tesoiras ou cortador e cinta adhesiva.

Procedemento:

1. Corta a parte superior da botella para que sexa máis doada de encher.

2. Fai buratos pequenos nos lados para que entre aire.

3. Coloca capas de restos orgánicos e follas secas dentro.

4. Cubre a botella coa súa tapa para manter a calor, pero permite que respire.

Con macetas ou cubos

Materiais: unha maceta grande ou un cubo con tapa, trade para facer buratos, terra ou compost inicial.

Maceta, cubo de plástico con tapa, trade e terra Procedemento:

1. Pide axuda a un adulto para que faga buratos nos lados e na base para ventilación.

2. Enche a maceta con capas alternadas de restos orgánicos e follas secas.

3. Colócaa nun recuncho preto do horto e remexe o contido de cando en vez para acelerar a compostaxe.

Ideas para crear un sistema de rego ecolóxico

Construímos depósitos de auga de chuvia

Materiais: bidóns grandes de auga ou deterxente por exemplo, tapas de plástico, teas ou reixas (para cubrir os bidóns e que non entren follas nin insectos), billa ou chave de paso reciclada para poñer na base do bidón (opcional), cinta adhesiva resistente ou silicona para selar e pinturas e pinceis para decorar (opcional).

Bidón, botella de plástico, cinta adhesiva, silicona, billa, bote de pintura e pincel Procedemento:

1. Lavar ben o bidón ou recipiente. Se é moi grande, cortar a parte superior para que sexa máis sinxelo recoller auga.

2. Se o bidón é grande, coa axuda dun adulto perfora un burato cerca da base e instala unha billa ou chave de paso reciclada (opcional). Usa silicona ou cinta resistente para selar arredor da billa e evitar fugas.

3. Cubre a abertura superior cunha reixa ou tea para evitar que entren follas, insectos ou sucidade.

4. Decorar o depósito coas pinturas e pinceis (opcional).

Construímos unha regadeira

Materiais: unha botella de plástico (mellor con asa e tapón de rosca como as do deterxente e o suavizante), un punzón, rotuladores para decorar (opcional) e auga.

Botella de deterxente, punzón e rotuladores Procedemento:

1. Lava ben a botella que vaias utilizar.

2. Co tapón enroscado, fai varios buratos na tapa cun punzón. Se está moi duro o plástico, pide axuda a un adulto e faino cunha agulla ou un cravo quente.

3. Decora a botella cos rotuladores (opcional).

4. Desenrosca o tapón, bota auga na túa regadeira e a regar!