2.1. A planta explosiva | Plantas ao rescate!

Imos xogar todos xuntos. O xogo consiste en pasar duns a outros unha "bomba" que tarda un tempo descoñecido en estoupar. Cada vez que a "bomba" caia nas túas mans, debes dicir unha palabra que se inclúa nunha determinada categoría. Se a palabra é correcta, podes pasar a "bomba" a outro xogador antes de que estoupe nas túas mans.

Peluche de tomate con mecha de bomba

Entre toda a clase seredes capaces de dicir todas as palabras relacionadas coas plantas?

Que necesitaremos?

- A "bomba" (pode ser un obxecto brando e lixeiro en forma de planta, algunha froita/hortaliza ou unha bóla).

- Un cronómetro ou música para determinar cando "estoupa a bomba".

- Un espazo amplo para que toda a clase se poida sentar comodamente en círculo.

Regras do xogo

Inicio

Sentamos en círculo.

A persoa docente ou unha voluntaria/o inicia a música ou o cronómetro.

Comezades a pasar a planta explosiva.

Mentres se pasa a "bomba"

Cada quen, ao recibir a bomba, debe dicir algo relacionado coas plantas da categoría na que está antes de pasala á seguinte persoa.

Por exemplo, se a categoría é partes da planta: follas, raíz...

Quen quede coa bomba

Cando a música pare ou o cronómetro chegue a cero, a persoa que teña a bomba debe cumprir un reto divertido como:

Imitar como medra unha planta.
Dramatizar como unha árbore resiste o vento.
Cantar unha canción sobre a natureza.
Debuxar unha planta no aire coas mans.
Nomear cinco flores que coñeza.
Explicar como medran as raíces.

A continuación, o xogo reinicia ata que todos participedes varias veces ou o tempo asignado remate.

Ideas de categorías

Para evitar repetir o mesmo, podemos ir cambiando a categoría das respostas en cada rolda. Por exemplo:

Rolda 1: partes das plantas.
Rolda 2: tipos de plantas ou árbores.
Rolda 3: usos das plantas.
Rolda 4: algo que necesitan as plantas para vivir.
Rolda 5: plantas das que comemos a raíz.
Rolda 6: plantas das que comemos o talo.

Se preferides crear as vosas propias tarxetas podedes descargar o modelo:

Lectura facilitada

Imos xogar todos xuntos.

Hai que pasar unha "bomba" que tarda un tempo descoñecido en estoupar.

Canto teñas a "bomba" tes que dicir unha palabra dunha categoría.

Se é correcta pasas a "bomba" a outro participante antes de que estoupe.

Seredes capaces de dicir todas as palabras relacionadas coas plantas?

Se preferides crear as vosas propias tarxetas podedes descargar o modelo: