Hai que ter en conta que esta xornada deportiva vai durar máis do que habitualmente dura unha sesión de Educación Física, polo que o normal é que o gasto enerxético dos participantes sexa maior.

Tendo en conta isto, poderíaselles indicar ás persoas participantes que traian algo para comer a media mañá, durante o descanso que se faga, ou cabería a posibilidade de falar con algún establecemento da zona para que colabore con nós. Como? Poderiades pedirlle a un supermercado ou a outro establecemento unha doazón.

Sería bo que colaborasen doándovos augas ou froita para as persoas participantes. Ocórresevos como facelo?

Se algo debedes ter claro é que o material deportivo será fundamental para levar a cabo a vosa xornada deportiva intercentros.

Que material necesitades? Dispoñedes do material suficiente tendo en conta o número de alumnado que vai participar?

Poderiades comunicarvos cos outros centros para saber do material do que dispoñen e así facer unha previsión de todo o que ides poder empregar.

E que sería desta xornada intercentros sen as persoas participantes? Unha das vosas funcións serán establecer a forma na que se confeccionan os equipos. Ao ser intercentros, o ideal é que os equipos se formen misturados, é dicir, que en cada equipo haxa nenos e nenas con representación de todos os centros participantes.

Hai que pensar que un dos obxectivos é que se relacionen con compañeiros e compañeiras que non acostuman ver tan habitualmente. Que opcións poderiades barallar para a elaboración dos equipos?

A organización de calquera actividade está marcada polos horarios, polo que vós tamén teredes que ter moi claros os tempos da vosa xornada deportiva.

Canto vai durar? A que hora haberá que estar no lugar escollido para realizar a actividade? En que momento haberá un descanso?

Estas son preguntas que tedes que resolver para ir perfilando o evento.

Se os principais protagonistas da xornada deportiva intercentros son as persoas participantes, hai que propoñerlles actividades divertidas.

Tendo en conta que estades a organizar unha xornada deportiva intercentros, o ideal será propoñerlles xogar partidos de diferentes deportes. Recordade que nas sesións de Educación Física coñecestes e practicastes catro deportes colectivos alternativos, polo que sería unha boa opción ensinarlles aos nenos e nenas que participen na xornada como se xoga a eses deportes.

Pero ollo! Decidiredes levar á xornada os catro deportes? Ou é mellor propoñer só dous? A decisión é vosa como organizadores e organizadoras.