Sesión 1

Obxectivo:

• Coñecer o regulamento básico do datchball e practicar habilidades técnicas fundamentais: lanzar, recepcionar, esquivar.

Quecemento:

Exercicios de activación con mobilidade articular.

A continuación, faredes 3 círculos co mesmo número de persoas. Cada grupo terá un balón de espuma e, cando escoitedes o sinal, deberedes pasar o balón ao compañeiro ou á compañeira da dereita, sen saltar ningunha persoa do grupo. O obxectivo é pasar o balón o máis rápido posible (sen que caia ao chan) e que chegue á persoa que comezou. Unha vez chegue o balón ao inicio, esta persoa deberá apoialo no chan como mostra de que rematou. Farédelo diversas veces para mellorar a velocidade de reacción, os lanzamentos e as recepcións.

Parte principal:

Nesta primeira tarefa teredes o campo delimitado con conos ou liñas, coas zonas de xogo e eliminación ben marcadas. Haberá 3 zonas de práctica.

• Zona 1: nesta zona traballaredes a precisión no lanzamento. Colocaranse aros ou outros símbolos de marcaxe a diferentes distancias e tamén con diferentes puntuacións. O obxectivo é realizar diferentes tipos de lanzamentos (por riba, por abaixo, lateral...) para mellorar esta habilidade. Usaredes balóns de espuma.
• Zona 2: nesta zona traballaredes por parellas. Unha persoa da parella fai un lanzamento dende 3-4 metros e a outra persoa da parella intenta esquivar. Logo dun tempo de práctica, cámbiase o rol. Igual que na estación 1, tamén practicaredes con balóns de espuma.
• Zona 3: por parellas, unha persoa lanza o balón de espuma e a outra debe recepcionalo.

Partidos condicionados:

Nestes partidos teredes as seguintes normas:

- 2 balóns en xogo.

- Se te tocan, saes.

Se un compañeiro ou compañeira fai unha recepción, o xogador ou xogadora que leva máis tempo eliminado/a volve ao xogo.

Volta á calma:

Estiramentos dos principais grupos musculares.

Sesión 2

Obxectivo:

• Aprender a identificar roles ofensivos e defensivos e mellorar a cooperación táctica no xogo.

Quecemento:

"Cazadores e cazadores con balóns": os xogadores e xogadoras que pillan levan un balón na man. O obxectivos dos cazadores e cazadoras é eliminar o maior número de participantes posible. O profesor ou profesora indicará como debe ser o lanzamento (directo, con bote, raso...). A xogadora ou xogador que recibiu un impacto co balón debe quedar quieto ou quieta coas pernas abertas e un compañeiro ou compañeira poderá salvalo/a pasando por abaixo.

Parte principal:

Faise un repaso das regras fundamentais do datchball e, despois,realizaredes unha tarefa de roles. Divídese ao grupo en 3 grupos rotativos. Cada grupo practica un dos seguintes roles durante 4-5 minutos:

• Atacantes: ides enfrontravos a un grupo pasivo e debedes lanzar para tocalos (sen rebote). Aquí desenvolveredes habilidades como a precisión, a toma de decisións e o desprazamento tras o lanzamento.
• Defensores: enfocarédesvos en esquivar e atrapar. Cada vez que atrapedes de xeito válido, sumaredes puntos para o grupo.
• Asistentes: ides movervos pola zona lateral. A vosa función é recoller balóns e entregalos aos atacantes ou defensores.

“Zona de salvación”: divídese ao grupo en dous e xogarase un partido con 5 balóns.

Este xogo ten as seguintes normas:

- Ao ser eliminado/a, o xogador ou a xogadora vai á zona lateral do seu equipo (zona de salvación).

- Se recibe un pase dende o campo e atrapa o balón, pode volver xogar.

Partidos condicionados:

Nestes partidos teredes as seguintes normas:

-Equipo de 5, 6 ou 7 persoas como máximo.

- 3 balóns en xogo.

- Se te tocan, saes.

- Se un compañeiro ou compañeira fai unha recepción, o xogador ou xogadora que leva máis tempo eliminado/a volve ao xogo.

Volta á calma:

Estiramentos dos principais grupos musculares.

Sesión 3

Obxectivos:

• Participar activamente en situacións reais de xogo regulamentado.
• Aplicar as habilidades e estratexias tácticas ofensivas e defensivas aprendidas.
• Amosar actitudes de respecto, deportividade e cooperación.

Quecemento:

Exercicios de activación con mobilidade articular.

A continuación, faranse 4 círculos co mesmo número de persoas. Practicaredes o kamikaze.

Parte principal:

Nesta parte xogaredes un pequeno torneo. Repasaranse as normas básicas e formaranse 4 equipos mixtos.

Os partidos xogaranse de 5 minutos ou ata que un equipo quede sen xogadores e xogadoras.

Xogarase con balóns de goma.

Os partidos serán rotatorios.

Haberá 2 partidos á vez, polo que estaredes a xogar os 4 equipos.

Volta á calma:

Estiramentos e reflexión final. Que opinades deste deporte? Cales son as diferenzas cos vistos anteriormente?