Cogomelos

• Os fungos máis coñecidos son os que forman os cogomelos, que son a súa parte reprodutiva. A súa unidade básica estrutural non reprodutiva é a hifa, filamentos finos e tubulares con parede de quitina que viven enterrados no solo e absorben nutrientes. O conxunto de hifas forma o micelio, que é o verdadeiro corpo de fungo.
• Cando as condicións son axeitadas, o micelio xera o cogomelo que é a estrutura reprodutiva visible. Esta estrutura está formada por diferentes partes como o sombreiro, o pé, a volva e o anel. Na parte inferior do sombreiro atópase o himenio que pode ter forma de láminas, poros, pregues ou agullas, e é onde se producen as esporas, encargadas de dar lugar a novos fungos. 

• Medran no chan, sobre madeira ou follas mortas. As setas aparecen rapidamente cando as condicións son favorables, e despois desaparecen, pero o fungo queda vivo baixo terra. Na seguinte montaxe podes ver diversas formas de fungos (preme na imaxe para agrandala).

Mofos

• Forman filamentos finos chamados hifas, que se entrelazan formando unha estrutura chamada micelio, con aspecto de algodón.
• Medran sobre alimentos e outras superficies húmidas.
• Exemplos: O Penicillium que produce penicilina e pode verse en queixos curados e o mofo do pan (Mucor). Na imaxe podes observar ao Penicillium digitatum, preme sobre ela para ampliala.

Cando escoitamos "mofo", adoita virnos á mente os fungos que estragan os alimentos ou invaden os recunchos máis húmidos das casas. Porén...Sabías que algúns mofos tamén axudan a facer queixos deliciosos ou medicamentos importantes? Se queres descubrir os seus segredos, segue lendo!

Lévedos

• Son unicelulares, de forma ovalada ou redondeada, só se ven ao microscopio.
• Reprodúcense por xemación que é cando aparece un avultamento chamado xema do que nace un novo lévedo.
• Utilízanse para facer pan, cervexa e viño. Exemplo: o lévedo do pan e para fabricar a cervexa (Saccharomyces cerevisiae).

Neste vídeo poderás observar lévedos ao microscopio con diferentes aumentos, chegando ata 1500X. Que significa iso? A cantas veces vémolos máis grande?

Liques

• Son unha asociación entre un fungo e unha alga (Protoctista) ou cianobacteria (Moneras). O fungo protexe a alga dándolle humidade e a alga realiza a fotosíntese polo que lle proporciona nutrientes ao fungo.

Na imaxe vese un corte do talo do liquen Physcia, onde se distinguen as hifas do fungo e as cianobacterias por cores diferentes. Saberías identificar cal é cal? Podes debuxalo

• Os máis comúns somo como costras pegados ás superficies denominados liques crustáceos; outros semellan follas planas ou pequenas láminas chamados liques foliáceos e outros parecen fíos finos que colgan chamados liques fruticulosos. Pódense atopar sobre rochas, muros, cortizas dos árbores en ambientes húmidos.