Saltar navegación

3.4. Warhol á galega

Elementos gráficos para a feira

É o momento de preparares algúns dos elementos gráficos para a feira artística. Trátase de crear deseños que se utilizarán para informar ás persoas visitantes e tamén para anunciar a feira.

Que tes que facer?

Cada equipo debe encargarse de preparar un destes elementos gráficos que se utilizarán na feira:

  • Cartel publicitario. Para informar sobre o lugar e horarios da feira artística.
  • Tarxetas credenciais. Servirán para identificarvos como as persoas organizadoras da feira e tamén como as persoas responsables de axudar e explicar as obras de arte.
  • Invitacións. Para pedir, ás persoas que decidades, a asistencia á feira artística.
  • Rótulos. Para sinalar cada posto da feira.

Le, xunto co teu equipo, a información sobre o produto de deseño gráfico que tes que elaborar. Coa descrición vai unha lista coas partes que debe ter a obra.

Podes utilizar o programa informático que queiras. Se preferides traballar de forma cooperativa podes utilizar Excalidraw, que é unha plataforma de Internet que permite que varias persoas traballen xuntas no mesmo proxecto. Con Excalidraw non precisas o rexistro na plataforma.

Videotitoriais

Aquí podes ver videotitoriais de como usar Excalidraw ou LibreOffice Draw. 

O exemplo é para un cartel que anuncia o Entroido pero pode aplicarse á creación do cartel da feira artística e aos outros produtos de deseño.

Excalidraw permite facelo de forma cooperativa. Se prefires traballar de forma individual podes utilizar o programa LibreOffice Draw.

Excalidraw



LibreOffice Draw


Cada produto debe levar unha imaxe que represente a Galicia.

  • Cartel publicitario: un pano.
  • Tarxetas credenciais: unha pandeireta.
  • Invitacións: o debuxo do hórreo que creaches na tarefa anterior.
  • Rótulos: unha cuncha de vieira.

Podes utilizar os debuxos que se recomendan na descrición de cada elemento gráfico ou ir á procura en Internet da imaxe que decida o teu equipo. Se prefires utilizar debuxos ou fotos de Internet, le o apartado seguinte.

Lectura facilitada

Tes que crear deseños que poidas utilizar na feira artística.

Cada equipo debe encargarse de preparar un destes produtos:

  1. Cartel publicitario.
  2. Tarxetas credenciais. 
  3. Invitacións.
  4. Rótulos. 

Nas seguintes páxinas explícase como se fai cada produto.

O teu grupo debe decidir se traballa de forma individual con LibreOffice Draw

ou de maneira cooperativa nun sitio de Internet como Excalidraw.

Cada produto debe levar unha imaxe que represente a Galicia.

  1. Cartel publicitario: un pano.
  2. Tarxetas credenciais: unha pandeireta.
  3. Invitacións: o debuxo do hórreo que creaches na tarefa anterior.
  4. Rótulos: unha cuncha de vieira.

Podes ir na procura de debuxos e fotos de Internet

ou poñer o debuxo que hai na explicación da tarefa.

No contido principal tes videotitoriais

para aprender a utilizar LibreOffice Draw 

e Excalidraw.

Uso de Internet

As imaxes que hai en Internet teñen unha autoría: foron creadas por alguén, e é importante recoñecermos quen as fixo ou como foron elaboradas. Que unha fotografía estea publicada en Internet non quere dicir que se poda facer calquera cousa con esa obra.

Ao publicar unha creación, a persoa autora pode engadir unha licenza que indica como se pode usar a súa obra: que está permitido facer e que non. Ás veces, non permite que se use, comparta ou modifique. Neste caso, dicimos que ten "todos os dereitos reservados" ou "Copyright", e necesitaríamos o seu permiso para utilizala.

Noutros casos, a obra inclúe un texto ou símbolo que informa do que está permitido facer. Isto chámase licenza, e hai dous casos principais:

  • Dominio público: significa que calquera pode usar, compartir ou modificar a obra libremente, por exemplo podemos utilizar unha fotografía de Rosalía de Castro, como esta

Fotografía de Rosalía de Castro

Esa fotografía pódela ver na Galipedia, foi creada por María Cardarelly, a primeira fotógrafa de Galicia, en 1865.

  • Obra con algúns dereitos reservados, o que quere dicir que hai cousas que non se poden facer coa obra, por exemplo modificala. Neste caso, a persoa autora pode empregar unha licenza chamada Creative Commons para indicar o que se pode e o que non se pode facer coa súa creación.

Aprende máis sobre as licenzas Creative Commons con este documento PDF (nova xanela)

Cando busques fotografías ou debuxos para as tarefas comproba a licenza e selecciona aquelas obras que sexan de dominio público ou con licenza Creative Commons.

Sitios de Internet para encontrar fotografías e debuxos:

Lectura facilitada

Hai imaxes que teñen autoría,

foron creadas por alguén.

Ás veces, non permite que se use,

dicimos que ten "Copyright".

Noutros casos teñen licenza

informa do que está permitido facer.

Hai dous casos principais.

1. Dominio público, calquera pode usar,

compartir ou modificar a obra.

2. Obra con dereitos reservados,

a  persoa emprega unha licenza,

Creative Commons,

hai cousas que non se poden facer coa obra.

Que tes que facer?

  • Comproba a licenza das fotografías ou debuxos que busques.
  • Selecciona aquelas obras de dominio público, ou con licenza Creative Commons.

Feito con eXeLearning (Nova xanela)